WAN - Parlamentera DEM Partiyê ya Wanê Gulcan Kaçmaz Sayyîgît bertek nîşanî vê yekê da ku Qada Bajêr a li kolana herî qelebalix a bajêr ji aliyê polîsan ve hatiye dorpêçkirin û bûye navenda civîna polîsan û wiha got: "Meydana Bajarê me jî bi barîkatan hatiye girtin û asteng dikin ."

 

Meydana Bajêr a ku li ser Kolana Cumhuriyetê ya Wanê ye ji bo gel hat qedexekirin. Qada bajêr ku tenê ji bo bûyerên walî û hikûmetê tê bikaranîn, polîtîkaya şerê taybet a hikûmetê ya li Kurdistanê radixe ber çavan. Qada ku bûye navenda kombûna polîsan û ji her alî ve bi barîkatan hatiye dorpêçkirin, bandoreke neyînî li tevahiya gel dike. Herî dawî Parlamentera Partiya Wekhevî û Demokrasiyê ya Gelan(DEM Partî) ya Wanê Gulcan Kaçmaz Sayyigit li ser hesabê xwe yê medyaya dîjîtal li ser Meydana Bajêr a ku li qada giştî ye lê ji aliyê gel ve tê qedexekirin, bertek nîşanî vê rewşê da. Gulcan têkildarî dorpêça li Qada Bajêr ji ajansa me re axivî.

 

'Rewşa Awarte defakto tê sepandin'

 

Gulcan bal kişand ku rewşa li Wanê ne nû ye û piştî hewldana derbeya 15'ê Tîrmeha 2016'an li her derê Rewşa Awarte hat îlankirin û destnîşan kir ku ji sala 2016'an vir ve li Wanê qedexeya xwepêşandan û çalakiyan hatiye îlankirin û wiha got: "Rewşa Awarte derketiye holê. Li Wanê kêm cihên ku mirov bêhna xwe hilîne hene û hejmara park û baxçeyan kêm in û divê ev qad bên berfirehkirin." Gulcan wiha got: “Niha cihê Meydana Bajêr navenda herî navendî ya Wanê ye, ji ber vê yekê ji bo kombûn, civîn û bêhnvedanê qadeke pir navendî ye, lê mixabin ev Meydana Bajarê Wanê ji aliyê polîsan ve hatiye dorpêçkirin. Cihê ku bi bariyerên polîsan hatiye dorpêçkirin, wesayîtên zirxî lê hene. Niha hem welatî hem jî esnafên Wanê ji vê yekê gazinan dikin. Me jî ji bo mebestên reaksîyonê peyamên xwe parve kirin û em ê li ser vê xebatê berdewam bikin. Em li benda daxuyaniya walîtiyê li ser vê mijarê ne."

 

'Mafê herî xwezayî tê desteserkirin'

 

Gulcan, anî ziman ku Meydana Bajêr bêfonksîyon e û tenê wekî qada hevdîtinê ya polîsan tê bikaranîn û wiha got: “Di rastiyê de qadeke ku jin û zarok bi rehetî bi hev re dema xwe derbas bikin pêwist e. Lê ne tenê li Meydana Bajêr, dema em li parkan dinêrin jî bi heman rewşê re rû bi rû ne. Her der bi bariyerên polîsan hatiye dorpêçkirin. Gelê li Wanê dijî, divê li wir li hev bicivin an jî li wir bêhna xwe bidin, ev yek tê desteserkirin. Em li dijî vê yekê ne, em li dijî vê ne. Em difikirin ku ev wêneyê ku em qebûl nakin û rast nabînin divê ji holê bê rakirin."

 

'Peyama 'Em dewletek polîs in û em ê li vir bin' ji raya giştî re tê dayîn

 

Gulcan, destnîşan kir ku hikûmet hewl dide bi rengekî awarte nîşan bide ku Rewşa Awarte berdewam dike û bi bîr xist ku DEM Partiyê di 31'ê Adarê de li Wanê ji 14 şaredariyan 14 şaredarî bi dest xistin û wiha got: "Divê em nefesê bigirin. Divê li gel şaredariyan, rêveberiyên herêmî yên demokratîk, paradîgmaya demokratîk a ekolojîk, azadiya jinê, qadên ku mirov li hev bicivin, bi hêsanî nefes bigirin û hê bêtir rehet bibin, bên afirandin. Di vî warî de jî lêkolîn tên kirin. Di rastiyê de ji raya giştî re peyama 'Em li vir in, em dewletek polîs in û em ê li vir bin' heye. Em vê peyamê teqez qebûl nakin û şermezar dikin. Ji ber vê yekê jî pêwîst e astengiyên li wir di zûtirîn demê de bên rakirin û Qada Bajêr ji raya giştî ya li Wanê dijîn re bê vekirin. Qada Bajarê me jî bi barîkatan hatiye girtin. Em careke din bi rêya çapemeniyê dibêjin, Meydana Bajêr bihêlin, bila ev der bibe cihê ku mirov bi taybetî jin û zarok û sewal li hev kom bibin û bêhna xwe vedin.”