NAVENDA NÛÇEYAN - Di çalakiyên nobedê de yên li dijî xespkirina vînê ya li Colemêrgê, welatiyên hatin ber şaredariyê pirsgirêkên we gotin û doza çareseriyê kirin. 

 

Çalakiyên nobedê yên piştî qeyûm tayinî Şaredariya Colemêrgê hat kirin hatin destpêkirin, didomin. 

 

Çalakiya nobedê ya ku Hêzên Aştî û Demokrasiyê yên Stenbolê li dijî desteserkirina îradeyê li Qada Şîşhane ya Beyoglûyê dabûn destpêkirin di roja xwe ya 8’emîn de berdewam kir. Di çalakiya ku gelek kes lê amade bûn de tîşortên bi nivîsa "Qeyûm bicehime" li xwe kirin. Di çalakiyê de pankarta "Taksîm a me ye, Colemêrg a me ye, 1'ê Gulanê azadiya me ye" hatin vekirin û dirûşmên "Bijî berxwedana Colemêrgê", "Şaredarî yên me ne", “Berxwedan Colemêrg, Stenbol bi te re ye” û “Her der Colemêrg” hatin vekirin û dirûşmên “Cih berxwedan e” hatin berzkirin.

 

Di nobetê de daxuyaniya Komîsyona Gelan û Baweriyan a Partiya Wekhevî û Demokrasiyê ya Gelan (DEM Parti) bi boneya 109'emîn salvegera Komkujiya Seyfo ya li dijî Suryaniyan ku di 15'ê Hezîrana 1915'an de dest pê kiribû, hat xwendin. Daxuyaniya çapemeniyê endamê Partiya Herêmên Demokratîk (DBP) Gokhan Ozer xwend.

 

Girîngiya têkoşîna hevpar Rêvebera Herêma Stenbolê ya Komeleyên Çandê yên Pirsultan Abdal Gulsev Kaya ku di nobetê de axivî, diyar kir ku ew çalakiya nobedê ya bênavber silav dikin û diyar kir ku di dîroka 100 salî ya komarê de li dijî gelan polîtîkayên asîmîlasyon û tinehesibandinê tên meşandin. Gulsev got, "Bijî têkoşîna me ya birêxistinkirî ya li dijî her cure êrîşên ku têkoşîna gelan a ji bo jiyana bi hev re paşguh dike." Piştî ku nûnerên partiyên siyasî û rêxistinên sivîl ên beşdarî nobedê bûn mafê axaftinê girtin, nobet bi lêdana sirûdên berxwedanê bi dawî bû.

 

Êlih

 

Çalakiya li Êlihê di roja 12'an de hat domandin. Rêveberiyên DEM Partî û DBP'ê yên bajêr û navçeyan, aktivîstên TJA'yê û nûnerên rêxistinên civaka sivîl ên bajêr jî tevlî çalakiyê bûn. Di çalakiyê de tim dirûşmeyên li dijî tayinkirina qeyûm hatin berzkirin û kilam hatin gotin. 

 

Amed

 

Çalakiyên li ber Şaredariya Bajarê Mezin a Amedê û 13 şaredariyên navçeyan hatin destpêkirin di roja 12'an de didomin. 

 

Endamên Platforma Parastina Bajêr û Piştevaniyê ya Amedê serdana nobeda li ber Şaredariya Bajarê Mezin a Amedê kirin. Hevşaredarê Şaredariya Bajarê Mezin a Amedê Dogan Hatûn endamên platformê pêşwazî kir. Li ser navê endamên platformê Serokê Baroya Amedê Nahit Eren axivî. Nahit destnîşan kir ku ew ê tim li dijî pergala qeyûmtiyê bisekin. 

 

Her wiha şêniyên Taxa Ferîtkoşk û Fîskayayê jî hatin ber şaredariyê û pirsgirêkên xwe yên di warê kelmêşan û avê de bilêv kirin û doza çareseriyê kirin. Hevşaredar Dogan Hatûn jî destnîşan kir ku ew ê di nêz de pirsgirêka avê çareser bikin. 

 

Îzmir

 

Rêxistina Navçeya Torbaliyê ya Partiya DEM Partiyê li dijî tayînkirina qeyûmê Şaredariya Colemêrgê li ber avahiya qeymeqamtiyê çalakiya rûniştinê li dar xist. Di çalakiyê de pankarta "Şaredarî yên me ne, ji qeyûman re na" hatin daliqandin û gelek caran dirûşmên "Ji darbeyê re na" û "Rizgarî bi tena serê xwe nîne, hemû bi hev re ne" hatin vekirin.

 

Bi stran dirûṣm û çepikan çalakî bi dawî bû.