STENBOL - Derbarê giliya ku nûçegihana me Esra Solîn Dal a li Girtîgeha Jinan a Bakirkoyê lêgerîna tazî lê hatibû ferzkirin kiribû, biryara neşopandinê hatibû dayîn. 

 

Nûçegîhanên Ajansa Mezopotamyayê (MA) Esra Solîn Dal, Mehmet Aslan û rojnameger Erdogan Alayûmat ku di çarçoveya lêpirsîna navenda wê Stenbol bû de di 26’ê Nîsanê de bi îdiaya “endamtiya rêxistinê” hatibûn binçavkirin û girtin, di 21’ê gulanê de hatin berdan. 

 

Rojnamevan Esra ya piştî hate girtin nêzî mehekê li Girtîgeha Jinan a Bakirkoyê di hucreya yek kesî de hate ragirtin, 2 caran lêgerîna tazî lê hate ferzkirin. Li ser vê yekê parêzera Esra Solîn, Ayşe Ozdemîr, di 14’ê gulanê têkildarî mijarê serî li Serdozgeriya Komarê ya Bakirkoyê da û gilî kir. 

 

Midûriyeta Girtîgeha Jinan a Bakirkoyê di parastina xwe ya di çarçoveya lêpirsîna hatiye destpêkirin de îdia kir ku lêgerîna tazî nehatiye kirin û lêgerîn “li gorî qanûnê” hatiye kirin.  

 

Serdozgeriya Komarê ya Bakirkoyê ya gilî û beyanên Midûriyeta Girtîgeha Jinan a Bakirkoyê lêkolînkirin îdia kir ku sûcekî ku lêkolîn bike nîne û biryara neşopandinê da.