Malbata Veysî Aktaş serî li OHD û ÎHD’ê da

  • 14:58 29 Gulan 2024
  • Rojane
 
AMED - Malbata Veysî Aktaş ê li Girtîgeha Îmraliyê tê tecrîdkirin û salek berdana wî hat taloqkirin, ji bo piştevaniya hiqûqî serî li OHD û ÎHD’ê da.
 
Li Girtîgeha Girava Îmraliyê 39 meh in agahî ji Rêberê PKK’ê Abdullah Ocalan û girtiyên li cem wî Omer Hayrî Konar, Hamîlî Yildirim û Veysî Aktaş nayê girtin. Veysî Aktaş herî dawî di 3’yê adara 2020’î de li gel malbata xwe hevdîtin pêk anîbû. Her wiha di 27’ê nîsana 2020’î de ji ber pandemiyê jî bi telefonê li gel malbata xwe axivîbû. Malbata Aktaş ji wê rojê ve agahî ji lawê xwe nagire. 
 
Veysî di 28’ê nîsana 2024’an de cezayê xwe yê 30 salan qedand. Berdana wî ji aliyê Desteya Îdare û Çavdêriya Girtîgehê ve ji bo salekê hat taloqkirin. Buroya Hiqûqê ya Asrinê serî li Dadgeriya Înfazê ya Bûrsayê da. Dadgehê di 2’yê gulanê de serlêdana buroya hiqûqê red kir. Parêzeran li ser vê yekê serî li 1’emîn Dadgeha Cezayê Giran a Bûrsayê da. Dadgehê vê serlêdanê dîsa red kir. 
 
Xwişkên Veysî Aktaş, Sabîha Aslan û Melîha Çetîn, ji parêzerên Buroya Hiqûqê ya Asrinê Mazlûm Dînç û Suzan Akîpa ji bo piştevaniya hiqûqî serî i Komeleya Hiqûqnasên ji bo Azadiyê (OHD) û Komeleya Mafên Mirovan (ÎHD) ên şaxên Amedê dan. 
 
Li Îmraliyê hiqûq tune tê hesibandin
 
Malbata Veysi Aktaş û parêzeran ewilî serî li OHD’ê dan. Malbata Veysi Aktaş li vir axivî û dan zanîn ku 39 meh in ew agahî ji Veysî Aktaş nagirin û xwestin hewldana hiqûqî bê kirin. Malbatê got her erdhejek li herêma Bursayê çêdibe ew dilgiran û xetere dibin.  Malbatê destnîşan kir ku rewşa agahînegirtina ji Îmraliyê xetereyê dide wan û diyar kir ku li Îmraliyê hiqûq tune tê hesibandin û xwest li dijî vê bêhiqûqiyê hewldan bên kirin. 
 
Hevserok û rêveberên Şaxa OHD’ê jî bi bîr xistin ku ew pê zanin ku li Îmraliyê bêhiqûqî tê kirin û ji bo ev rewş bi dawî bibe dê têkoşina xwe bidomînin. 
 
Aslan: Zilm li me tê kirin 
 
Malbata Aktaş û parêzer piştre çûn serdana ÎHD’a Amedê û piştevanî ji wan xwestin. Sabîha Aslan da zanîn ku di 9 salan de wan tenê sê caran Veysî dîtiye û ev yek jî nayê qebûlkirin. Sabîha Aslan anî ziman ku di mirina bavê wê de û di erdheja Mereşê de destûr nehatiye dayîn ku li gel Veysî pêwendiyê deynin û got: “Divê niha me li kêleka hev bûna. Divê bihata berdan. Pêwîste ev bêedaletî nebe. Ev tişta kut ê kirin zilm e.” 
 
Melîha Çetîn jî xwest dawî li bêhiqûqiya li Îmraliyê were û got: “Edalet li Tirkiyeyê nemaye. Em nikarin pirr derdê xwe jî bînin ziman. 30 sal emrek e. Ka bila ew vê bijîn. 9 sal in ji xeynî dengê avê tiştek nabihîzin. Telefon, hevdîtin tine, tiştekî din tine. Bavê me mir lê em nizanin ka bihîstiye an na.” 
 
Têkoşîna ji bo dawîkirina tecrîdê 
 
Serokê ÎHD’a Amedê Erdan Yilmaz jî destnîşan kir ku ji bo hevdîtin li Îmraliyê pêk were wan 4 caran serlêdan kiriye û got: “Ji bo dawî li tecrîdê were anîn, em ê têkoşîna xwe bidomînin.”