NAVENDA NÛÇEYAN - Çalakiyên li dijî Forûma Aboriyê ya Cîhanê (WEF) ku di 21'ê çileyê de li bajarê Davosê yê Swîsreyê dest pê kir, dewam dikin. Bi hezaran kesên li Zurîchê li hev kom bûn bi dirûşma "Na ji WEF'ê re (No WEF)" çalakiyek li dijî civîna bilind a Davosê li dar xistin. 

 

Forûma Aboriyê ya Cîhanê (WEF) îsal cara 50'emîn pêk tê. Çalakiyên li dijî forûmê dewam dikin. Civîna bilind ku di 21'ê çileyê de dest pê kir û wê heta 24'ê çileyê dewam bike, bi beşdariya siyasetmedar, karsaz, nûnerên saziyên civakî yên sivîl û zanyaran ji 90 welatî 2 hezar û 800 kes tevlî bûne.

 

Bi hezaran kes bi banga rêxistinên ekolojîst û antî faşîst ên Swîsreyî li hev kom bûn û bi meşekê WEF protesto kirin. Aktîvîstên Tevgera Ciwanên Şoreşger jî tevlî çalakiyê bûn. Di çalakiyê de li hin deveran di navbera polîsên Swîsreyê û xwepêşandêran de şer derket. Çalakiya ku ciwanên Kurd pankarta bi nivîsa "Rojava biparêze" û "Şer kujerê avhewayê ye" tevlî bûn. Meş li nava bajêr pêk hat û li dijî krîza avhewayê û kapîtalîzmê dirûşm hatin berzkirin. Her wiha ji bo Rojava banga piştgiriyê hat kirin.

 

Di çalakiyê de Serokê DYE'yê Donald Trûmp û Serokkomarê Tirk R. Tayyîp Erdogan ji ber êrişên li hemberî Rojava hatin şermezarkirin.