NAVENDA NÛÇEYAN - Desteya Jin a Rêveberiya Xweser bi panelekê xurtkirina jinan di aliyên siyasî û aborî de nîqaş kir. Panel bi biryarên girîng bi dawî bû.

 

Desteya Jin a Rêveberiya Xweser a Bakur û Rojhilatê Sûriyeyê bi sernavê 'Xurtkirina Jinê di aliyê siyasî û aborî de (êş-astengî-asoyên çareseriyê)' panelek li dar xist.

 

Panel li Hola Mişwar a li rojavayê Reqayê bi beşdariya endamên rêxistinên jinan ên Bakur û Rojhilatê Sûriyeyê û nûnerên Rêveveberiya Xweser hate lidarxistin.

 

Di beşa yekemîn a panelê de cîgira berdevka Meclisa Jin a Partiya Sûriya Pêşerojê Semîra El Ezîz li ser mijara çawanya xurtkirina jinan di aliyê siyasî de axivî û got: "Hê jî pêdiviya civakên ku gavên destpêkê ber bi avakirinê ve diavêjin, bi xurtkirina jinan di tevahî aliyên aborî, siyasî, civakî û çandî de heye. Pêşketin û avakirina ku hemû beşên civakê beşdar nebin kêm dimîne."

 

Semîre destnîşan kir ku civakên pêşketî tevahî beşên xwe beşdarî avakirina şaristaniyê dikin û ji bo ku ji hêza wan sûd werbigirin rol dide wan.

 

Semîre bal kişand ser serketina şoreşa jinê li Rojava-Bakur û Rojhilatê Sûriyeyê û wiha pê de çû: "Jinê hêza xwe ya dayînê ceriband, kir nimûne û wêneyekî geş da û pirsporî û hebûna xwe ya nayê paşguhkirin îsbat kir."

 

Gerînendetiya Rêveber a Komeleya Yasmîn Cîhan El Seîd di beşa duyemîn a panelê de li ser çawaniya xurtkirina jinan di aliyê aborî de axivî û behsa bandora hin kevneşopiyên civakî li jinan kir.

 

Panel bi van biryaran bi dawî bû:

 

Piştgiriya xebata veguharandina demokratîk, belavkirina çanda neteweya demokratîk, mafê cudabûn û pirrengiyê, hevqebûlkirin û têgînên pirrengiya civakî.

 

Danasîna lihevkirinên navneteweyî yên girêdayî qanûnên jinê, piştgirî û xwedîlêderketina wan.

 

Perwerdekirina jinan ji bo xwe gihîştina navendên biryarê.

 

Xurtkirina asta saziyên civaka sivîl ku parastina mafên jinan dikin.

 

Sûdwergirtina ji derfetên xwecihî û derve bi rêya xurtkirina peywendiyan.

 

Xurtkirina rola jinê di xebata aştî, lihevanîn û çareserkirina şeran de.

 

Piştgirî û fînansekirina projeyên xurtkirina jinê di aliyê aborî de ji hêla Desteya Jinê ve.

 

Zêdekirina panel, forum û rûniştinên der barê xurtkirina jinan di aliyên siyasî û aborî de.

 

Xebitandina li ser pêkanîna qanûna malbatê li Bakur û Rojhilatê Sûriyeyê.