NAVENDA NÛÇEYAN - Akademiya Rizaşehrî ya li bajarê Dortmûnd ê Elmanyayê, di 18-19’ê Cotmeha 2023’an de "Konferansa Çand, Huner, Wêjeyê" lidar xist.

 

Akademiya Rizaşehrî (RA) armanc dike ku dîroka baweriya Elewî, felsefe, teolojî, mîtolojî, rîtuel û nirxên wê yên civakî-çandî lêkolîn bike, biparêze û ragihîne nifşên siberojê. Di vê çarçoveyê de 22-23’ê Nîsanê “Konferansa Akademîsyenan” hatibû lidarxistin.

 

Di konferansa 18-19’ê Cotmehê de jî, hat armanckirin ku vê xebata akademîk bi xebatên nivîskar û hunermendan a li ser çanda Rêya Heq a Kurd re bînin ba hev.

 

Li gorî encamnameya konferansê beşdarvanên konferansê di roja yekem de, aliyên cuda yên çand, huner û wêjeyê bi 8 sernavên cuda nîqaş kirin.

 

Beşdaran di vê konferansê de qala xweseriya akademîk, dîroka Elewîtiyê, teolojî, erdnîgarî, mîtolojî, huner û wêjeya wê kirin. Her wiha di bin sernavên cuda de hin mijarên esas hatin nirxandin:

 

*Ji bo ku baweriya Elewî hîn baştir were naskirin, ji bo zarok û ciwanan amadekirina pirtûkeke bi anîmasyon.

 

*Nirxandina têgehên çandî û bawerî yên baweriya Rêya/Raa Heqî û veguherandina pirtûkekê.

 

*Piştgirîdayîn, pêşxistin û belavkirina berhemên hunerî yên di zimanê Kurdî de.

 

*Komkirina nivîsên di zimanê Kurdî de, analîzkirin û weşandina wê.

 

*Destpêkirina xebatên Muzeya Etnografiyê.

 

*Ji bo jinan vekirin qursên terziyê, nasandina berhemên wan û li ekonomiyê tevlêkarî kirin.

 

*Avakirina komîsyonekî ku di qada çand, huner û wêjeyê de bixebite.

 

Weke encam hat destnîşankirin ku merasîmên bi vî rengî ji bo parastina çand û hunerê gelekî girîng e. Akademiya Rizaşehîr spasiya dostên ku beşdarî vê konferansê bûn, kir û diyar kir ku ew ê hêviyên xwe yên ji bo siberojê zindî bihêlin.