NAVENDA NÛÇEYAN - Jîna Emînî û 'Jin, Jiyan, Azadî' hêjayî Xelata Sakharovê hate dîtin.

 

Parlamenta Ewropayê roja pêncşemê Xelata Azadiya Fikrî ya Sakharovê da jina Kurd a ciwan Jîna Emînî ya hate qetilkirin û tevgera jinê ya 'Jin, Jiyan, Azadî'.

 

Seroka Parlamenta Ewropayê Roberta Metsola got, "Jîna Mahsa Amînî 16'ê Îlona 2022'an ji ber ku serê xwe nenixumandiye ji aliyê polîsan ve hate girtin û piştî sê rojan bi rengekî hovane hate kuştin. Ev yek bû serdemeke diyarker."

 

Roberta got, "Vê bûyerê tevgerek bi pêşengiya jinê da destpêkirin ku cihê xwe di dîrokê de girt. Dirûşma 'Jin, Jiyan, Azadî' li Îranê veguherî qîrînekê ku her kesên daxwaza wekhevî, rûmet û azadiyê dikin li dora wê li hev kom bûn."

 

Jîna Emînî 16'ê Îlona 2022'yan li Tehranê ji aliyê polîsên exlaqê ve hatibû qetilkirin û ev yek bûbû sedema destpêkirina raperînekê.

 

Xelata Azadiya Fikrî ya Sakharov ji sala 1988'an û vir ve ji aliyê Yekîtiya Ewropayê ve tê dayin û xelateke naskirî ye.