ÊLIH - Parlamentera HEDEP'ê ya Şirnexê Newroz Uysal di panela ku li Mîhrîcana Çand û Hunerê ya Jinê ya bi dirûşma "Jina azad hunera azad" hat lidarxistin de axivî û got, "Pergala ku li şûna Kurdên azad, Kurdên kole dixwaze, tecrîdê didomîne. “Helwesta Birêz Ocalan a li hemberî tecrîdê berxwedan e.

 

Mîhrîcana Çand û Hunerê ya Jinê ku ji aliyê Organîzasyona Sanatça, Konfederasyona Sendîkayên Kedkarên Cemaweriyê (KESK) û Konfederasyona Sendîkayên Karkerên Şoreşger (DÎSK) ve li Êlihê bi dirûşma “Jina Azad Hunera Azad e" hat organîzekirin, di roja xwe ya duyemîn de berdewam dike. Zarok MA di roja duyemîn a Mîhrîcanê de li Petrolkentê bi zarokan re hat cem hev. Di şahiya ku tevlîbûneke mezin lê hat kirin de, zarokan pêşî wêne xêz kirin, piştre xeleka xwe ava kirin û stranên Kurdî gotin. Şahiya ku malbatan jî tê de cih girt, bi govendê bi strana “Zimanê Kurdî” ku ji aliyê zarokan ve bi yek dengî hat gotin, bi dawî bû.

 

Di çarçoveya mîhrîcanê de li Şaxa Petrol Îş a Êlihê bi moderatoriya aktîvîsta TJA’yê Ruken Zeryam Işik Yildiz panel hat lidarxistin. Di panelê de Parlamentera Şirnexê ya Partiya Wekhevî û Demokrasiyê (HEDEP) Newroz Uysal Aslan û Hevgerînendeya Kovara Destarê Jin Aryen axivîn. Tevgera Jinên Azad (TJA), Dayikên Aştiyê, Platforma Ked û Demokrasiyê ya Êlihê, Rêxistinên Partiya Herêmên Demokratîk (DBP) û HEDEP'ê û gelek kes beşdarî panelê bûn.'Binpêkirinên mafan bi tecrîdê tên kirin'

 

'Bi tecrîdê maf tên binpêkriin'

 

Parlamentera HEDEP'ê ya Şirnexê Newroz Uysal di panelê de axivî û diyar kir ku tecrîd bi awayekî giran dewam dike û got, “Rêbazên ku li qada navneteweyî hene nayên sepandin. Ji xwe qanûnên xwe jî pêk naynin. Di hiqûqa navneteweyî de hevdîtina bi parêzer û malbatê re di bin tu şert û mercan de nayê astengkirin. Lê belê li Îmraliyê bê hincet astengî tên kirin.  Birêz Ocalan got, 'Tecrîd ji roja ku ez hatim girtin ve tê meşandin.' Tecrîda ku bi komployê dest pê kir hê jî didome. Ev yek her roj bi awayekî dijwartir tê kirin. Tecrîd binpêkirin e."

 

'Li dijî asîmîlasyonê divê em berxwedaneke topyekûn nîşan bidin'

 

Jin Aryen jî diyar kir ku berdewamkirina tecrîdê û nehiştina bidawîkirina tecrîdê sedema xwerexnekirinê ye û got ku divê pêkanîna vê xwerexnekirinê bi dawîkirina tecrîdê bê nîşandan. Jinê bal kişand ser polîtîkayên asîmîlasyonê jî û got, “Birêz Ocalan li dijî polîtîkayên asîmîlasyonê bal kişand ser girîngiya hêza jinê. Da zanîn ku li dijî polîtîkayên asîmîlasyonê hêza bingehîn jin in. Divê em bi berxwedaneke topyekûn li dijî polîtîkayên asîmîlasyonê yên hikûmetê bisekinin. Nêzîkatiya Êlihê ya ji bo kurdî pir baş e. Li vir li dijî polîtîkayên asîmîlasyonê helwesteke tund heye.  Êlih bi vê helwesta xwe bajarekî ku hem ziman û hem jî çanda xwe pêş dixe ye. Ev helwest girîng e"

 

Jinê diyar kir ku di helwesta li dijî polîtîkayên asîmîlasyonê de zîhniyet xwedî cihekî girîng e û wiha got: “Giringiya zihniyetê bi nêzîkbûna ziman û nêzîkatiya çandê tê pîvan. Ger zîhniyeta me li ser pêşxistin û belavkirina çand û zimanê me be, divê bi heman rêbazê têkoşîn bê meşandin. ”

 

Panel bi pirs û bersivan bi dawî bû.