NAVENDA NÛÇEYAN - Platforma Dîplomasiya Civakî û saziyên civakî yên Bakur û Rojhilatê Sûriyeyê cangoriyên êrişa 20'ê Hezîranê bi bîr anîn, êrişên qirkirinê yên dewleta tirk şermezar kirin û hat diyarkirin “Em ê bi birêxistinbûn û kombûna li dora nirxên şoreşa civakî bersiva êrişan bidin.”

 

10 sazî û tevgerên civakî yên Bakur û Rojhilatê Sûriyeyê têkildarî êrişên dawîn ên dewleta tirk ên li dijî herêmê daxuyaniyek da.

 

Daxuyanî li pêşiya avahiya Navenda Lêkolîn û Şêwirên Stratejîk a li taxa Meheta ya li Qamişloyê hat xwendin.

 

Mamosteya zimanê kurdî Ehlam Esed, endamê nivîsgeha Hevgirtina Olên Mezopotamyayê Hena Somî daxuyanî bi zimanên kurdî û erebî xwend.

 

Di destpêka daxuyaniyê de cangoriyên doza azadiyê hatin bibîranîn û ji malbatên wan û gelê herêmê re sersaxî hat xwestin.

 

Şerê qirkirinê yê dewleta tirk ê li dijî gelê herêmê, hat şermezarkirin û îşaret bi êrişên dagirkeriyê yên ji destpêka Şoreşa Rojava-Bakur û Rojhilatê Sûriyeyê ve pêk tên, hedefgirtina têkoşer û welatparêzan, destekdayîna çeteyên DAIŞ’ê, dagirkirina herêmên Sûriyeyê kirin.

 

Di dewama daxuyaniyê de êrişa hewayî ya dewleta tirk a di 20'ê Hezîranê de li dijî hevserok û endamên meclisa kantona Qamişloyê hat bibîrxistin û wiha hat gotin: “Ev êrişa hovane ya ku hemû qanûnên navdewletî û rêgezên exlaqî binpê dike, di çarçoveya hemleya qirkirina sîstematîk de pêk hat. Jinên di nava civakê de bibandor bi awayekî taybet hedef digirin û bi rêbazên bêexlaqî şerê taybet didin meşandin. Bi vî awayî dixwazin bawerî û moralê civakê bişikînin û gel ji doza xwe û welatê xwe bidin dûrxistin.”

 

Berdewamiya daxuyaniyê wiha ye: “Em wek Platforma Dîplomasiya Civakî û sazî û tevgerên civakî yên Bakur û Rojhilatê Sûriyeyê, van êrişan şermezar dikin, soza şopandina rêya şehîdan û berdewamkirina ked û xebatên wan didin. Dê hêzên dagirker nikaribin îradeya civaka me binpê bike. Em ê bi xurtkirina birêxistinbûna xwe û kombûna li derdor nirxên xwe yên civakî bersiva erîşan bidin.”

 

Em bang li hemû sazî û rêxistinên mafê mirovan dikin ku dawî li bêdengiya xwe bînin û li hember êrişan xwedî helwest bin.

 

Bang li gelê xwe jî dikin ku bi rêxistinbûna xwe û girêdana xwe bi nirxên Şoreşa Civakî re, hemû siyasetên qirker bişikînin û li pey doza xwe ya wekhevî, edalet û demokrasiyê bi gavên xurt bimeşin.

 

Sersaxî ji malbatên şehîdan û hemû gelê me re.

 

Şehîd Namirin!”

 

Saziyên beşdarî daxuyaniyê bûne:

 

Platforma Dîplomasiya Civakî

Tevgera Civaka Demokratîk

Zanîngeha Rojava

Hevgirtina Olên Mezopotamyayê

Kongra Îslama Demokratîk

Tevgera Çand û Hunerê

Şaredariya Qamişloyê

Yekitiya Ragihandina Azad

Kombenda Civakî ya Efrînê

Komeleya Keziyên Kesk