NAVENDA NÛÇEYAN – Li Lozan a Swîsreyê bernameya  ‘Balyozxaneya Cîhaneke Nû: Kurdistan’ dest pê kir

 

Bername ji alî endam KNK’ê û siyasetmedara Kurd Nîlûfer Koç û hunermend Jonas Staal ve bi nerîna hunerî, çandî û siyasî ve hatiye çêkirin. Organîze û malovaniya projeyê jî Şanoya Lozana Vidy (Théâtre Vidy-Lausanne) ku yek ji şanoyên pêşeng ên Swîsre û Ewropayê ye, kir. Saziyên navneteweyî yên wekî Weqfa Mondriaan û Progressive International jî piştgirî dan projeyê. 

 

Bername bi beşdariya hunermend, siyasetmedar û akademîsyenên ji gelek welatên cîhanê hatin û bi 2 komxebatên cuda dest pê kir.

 

Di komxebata ‘Demokrasiya bêdewlet’ de ku bi ser navê 'Konfederalîzma Demokratîk' bi beşdariya Nîlûfer Koç, ekonomîstê Amerîkî David Adler û aktîvîsta mafên mirovan a Swîsreyî Elisabeth Decrey Warner hat lidarxistin. Di komxebatan de bal kişandin ser fikrên Rêberê PKK’ê Abdullah Ocalan ên li ser esasê Konfederalîzma Demokratîk a li 4 parçeyên Kurdistanê pêk hatine.

 

Di axaftina pêşkêşkirinê de hat gotin ku di 1923’yan de bi Peymana Lozanê re Kurdistan ji aliyê hêzên navdewletî ve li netewe dewletan hat parvekirin û hate destnîşankirin ku projeya Konfederalîzma Demokratîk ji holê rakirina vê mantiqê netewe-dewletê ye. Di axaftinan de hat diyarkirin ku îro yekîtiya çar parçeyên Kurdistanê tê armanckirin.

 

Di komxebatê de têkoşîna jinê ya ku ji bo Konfederalîzma Demokratîk bi berfirehî hat nîqaşkirin, têkildarî afirandin û domandina şoreşa Rojava jî nirxandin girîng hatin kirin.

 

Komxebateke din a ku ji aliyê sendîkavana Bangladeşî û damezrînerê Weqfa Awajê Nazma Akter ve hat lidarxistin. Di komxebatê de rewşa sendîka û karkerên Bangladeşê bi giştî hat nîşandan.

 

Di komxebata ku bi sernavê "Têkoşîna Jinê ya Yekîtiyê" hat organîzekirin de, bal kişand ser zext û zordariya pergala kapîtalîst a li ser jinê û li ser girîngiya projeya Konfederalîzma Demokratîk a ji bo rizgarkirina jinan rawestiya.

 

Ji Akademiya Jineolojiyê ya Başûrê Kurdistanêr rojnamevan-nivîskar Necîbe Qeredaxî, ji Hindistanê parêzer û şêwirmenda siyasî Varsha Gandikota û ji Fransayê jî nivîskar Fatima Ouassak wekî panelîst beşdarî bernameya komxebatê ya bi sernavê ‘Kolonyalîzma Bêdewlet’ bûn. Komxebat wê bi dayîna konser bi dawî bibe.