NAVENDA NÛÇEYAN - YSK’ê qedexeyên di roja hilbijartinên 14’ê Gulanê de eşkere kir. 

 

Lijneya Bilind a Hilbijartinê (YSK) qedexeyên di roja hilbijartinên 14’ê Gulanê de eşkere kir. Li gorî qedexeyan; di roja 14’ê gulanê de heta saet 18.00’an tu weşan nikarin têkildarî endamên hilbijartinê texmînan bikin. Qedexeya weşanê dê heta saet 21.00’an bidome. 

 

Di metna qedexeyan a YSK’ê de wiha hate gotin: “Li gorî xala 80’emîn a Qanûna hejmar 298; 

 

a) Di roja hilbijartinê heta saet 18.00’an tu radyo û dezgehên ragihandinê nikarin têkildarî hilbijartin û encamên hilbijartinê de texmîn û şîroveyan bikin. 

 

b) Hemû dezgehên ragihandin di navbera saet 18.00’ê û 21.00’an de tenê dikarin nûçe û teblîgên Lijneya Hilbijartinê ya Bilind ên têkildarî hilbijartinê biweşînin. 

 

c) Ji saet 21.00’an û şûnde weşan serbest in lê belê heke Lijneya Bilind a Hilbijartinê pêwîst bibîne, dikare beriya saet 21.00’an jî destûrê bide ku dezgehên ragihandinê weşanê serbest bikin. Ev biryar di 11.03.2023’an de bi piraniya dengan hatiye qebûlkirin.”