NAVENDA NÛÇEYAN - Li Hewlêrê greva birçîbûnê ya Nûnertiya HDP'ê ya Herêma Kurdistanê ku duh li dijî tecrîdkirina Rêberê PKK'ê Abdullah Ocalan û ji bo piştgiriya çalakiya Leyla Guven hatibû destpêkirin, di roja duyemîn de didome.

 

Nûnertiya HDP’ê li Hewlêrê bi armanca rakirina tecrîda li ser Rêberê PKK’ê Abdullah Ocalan û piştgirîdayîna çalakiya Leyla Guven ku ev 15 roj in li dijî tecrîdê dest bi greva birçîbûnê kiriye, duh dest  bi greva birçîbûnê ya bê dem û dorveger kir. Çalakiya greva birçîbûnê di roja duyemîn de berdewam dike.

 

Çalakiya greva birçîbûnê ya li Hewlêrê bi tevlîbûna endamên nûnertiya HDP’ê û welatiyên ji Bakurê Kurdistanê yên koçî  Başûrê Kurdistanê kirine pêk tê.

 

Hevseroka Kongreya Civaka Demokratîk (KCD) û Parlamentera HDP'ê ya Colemêrgê Leyla Guven, ji bo şermezarkirina tecrîda li ser Rêberê PKK'ê Abdullah Ocalan ev 15 roj in li Girtîgeha Tîpa E ya Amedê di greva birçîbûnê ya bê dem û bê dorveger de ye.