ÎDIR -  Qeyûmê Şaredariya Îdirê Qeymeqam Abdullah Kadioglu, bîrdariya Aştî, Xwişk û Biratiyê ya di sala 2016'an de hat avakirin û jinek kurd û azerî dest dane hev û nûnertiya yekîtiya gelê azerî û kurdan dike, rakir. 

 

Bi fermana Qeyûmê Şaredariya Îdirê Qeymeqam Abdullah Kadioglu, bîrdariya Aştî, Xwişk û Biratiyê ya di sala 2016'an de hat avakirin û jinek kurd û azerî dest dane hev û nûnertiya yekîtiya gelê azerî û kurdan dike, hat rakirin. Şaredariya Partiya  Herêmên Demokratîk (DBP), di sala 2016'an de li Şaredariya Tozan Bîrdariya Aştî, Xwişk û Biratiyê ku nûnertiya yekîtiya gelê kurd û azerî dike çikilandibû. Bîrdarî ji aliyê Hevseroka Giştî ya HDP'ê Fîgen Yuksekdag ve hatibû vekirin. Yuksekdag, diyar kiribû ku bîrdarî xeyal, bawerî, heviyên wan xêz dike û wiha gotibû: "Dîsa nûnerê van hêvî û xeyalan jinê xêz dike. Yek jê jina kurd û yek jî jina azerî ye. Jina azerî û kurd dest dane hev û çand, rengê gelan û neteweyan temsîl dikin. Dest dane hev û nîşan dide ku yekîtiya çand û baweriyan girîng e. Em bawer dikin ku dê gelên herêmê jî dest bidin hev û dawî li şer, zilm tundiyê bînin. Em ji Îdirê heta Edîrneyê, bang li çar aliyê Tirkiye dikin ku ji bo aştiyê destê xwe bidin hev. Em dê li ser vê axê jibo azadî û demokrasiya gelan têkoşîna xwe berdewam bikin. 

 

Lê bîrdarî bi fermana Qeyûm-Qeymeqam Abdullah Kadioglu ve hat rakirin. Li ser bîrdariyê Danezana Mafên Mirovan a Gerdûnî hatibû nivîsandin. Karkerên Şaredariya Îdirê bi fermana Qeyûm bîrdarî bi maşîneyên kar hilweşandin. 

 

Hevserokê Rêxistina HDP'ê yê Tozanê Cemşit Bozyîgît jî diyar kir ku ev bîrdarî sembola gelên ku li ser vê axê bi hevre dijî bû û wiha got: "Bîrdariyê nûnertiya yekîtiya gelên li ser vê axê dikir. Yek jê kurd û yek jî azerî bû. Destê xwe dabûn hev û şepala azadiyê bilind kiribûn. Bi vê hilweşandinê nîşan didin ku yekîtiya gelan jî qebûl nakin û dixazin gelê kurd û azerî li hev sor bikin. Lê bi salan e gelê kurd û azerî di nava hevde dijîn û ketine nava hev. Li ser sifreyekê xwarin xwarine û jiyan li hev parvekirine. Ne pêkan e bên dijberî hev. Em vê yekê bi tundî şermezar dikin."