Îlaham Eloso

 

KOBANÊ - Jinên Ereb ên bajarokê Sirînê roja 8'ê Adarê li tevahî jinên cîhanê pîroz kirin û gotin:"Roja bi wate û pîroz ji bo tevahî jinên cîhanê ye,  divê hemû rojên me wekî 8'ê Adarê bi coş û bi têkoşînek mezin derbas bibe."

 

Bi munasebeta 8'ê Adarê Roja Jinê ya Cîhanê, jinên Ereb ên Bajarokê Sirînê yê Kobanê yê herêma Firatê nerînên xwe parve kirin û gotin:"Em ê bi rihê berxwedana Leyla Guven 8'ê Adarê pêşwazî bikin."

 

'Leyla Guven sembola aştî û azadiyê ye'

 

Ferdûs Kino roja 8'ê darê li tevahî jinan pîroz kir û got:"Roja têkoşîn û berxwedana jinê, her dem zindî maye. Em ê vê têkoşînê berdewam bikin û li dijî zihniyeta faşîst û dagirker li berxwe bidin. Di şexsê berxwedana Leyla Guven de roja 8'ê Adarê wek her sal bi reng û dengê jina azad pîroz bikin. Leyla Guven sembola aştî û azadiyê ye."

 

'Em ê têkoşîna xwe ya li dijî dijminatiya jinê bidomînin'

 

Xedîca Kinî jî wiha got:"Ev roja bi felsefeya Rêber Apo hat naskirin û bi wate bû. 8'ê Adarê li Rêber Abdullah Ocalan û tevahî jinên têkoşer pîroz be. Wateya vê rojê pir cuda ye taybet ji bo jinên bakur û rojhelatê Sûriyeyê  ku hîn têkoşîna xwe didomînin. Em ê têkoşîna xwe ya li dijî dijminatiya jinê bidomînin."

 

'Em ê bi rihê berxwedana Leyla Guven 8'ê Adarê pêşwazî bikin'

 

Her wiha Merwa Remo jî wiha got:" Bi çalakiyan seranserî cîhanê jin vê rojê pîroz dikin û bi wate dibînin. Divê em hemû jin di vê rojê bên gel hevdu û li dijî tundiya li ser jinê em dengê xwe bilind bikin.Roja bi wate û pîroz ji bo tevahî jinên cîhanê ye,  divê hemû rojên me wekî 8'ê Adarê bi coş û bi têkoşînek mezin derbas bibe. Em ê bi rihê berxwedana Leyla Guven 8'ê Adarê pêşwazî bikin."