NAVENDA NÛÇEYAN - Rêveberiya Xweser a Şengalê ji bo danasîna fikrê netewa demokratîk a Rêberê PKK'ê Abdullah Ocalan û rêya çareseriya pirsgirêkên Iraqê wê sibehê li Şengalê bi sernavê ‘’Çareseriya pirsgirêkên Iraqê di Neteweya Demokratîk de’’- komxebatekê li dar bixe.

 

Li Şengalê di çarçoveya têkoşîna li dijî tecrîda li ser Rêberê PKK'ê Abdullah Ocalan û xurtkirina kampanyaya “Dem Dema azadiyê ye”, rêzeçalakî û xebatên Rêveberiya Xweser a Şengalê berdewam dikin.

 

Bi vê armancê  wê 25’ê Sibatê saet 09-00’an de li Hola Azadî ya navenda Şengalê bi sernavê ‘’Çareseriya pirsgirêkên Iraqê di Neteweya Demokratîk de ye” komxebatek wê bi rê ve biçe. Komxebat ji aliyê Rêveberiya Xweser a Şengalê ve tê lidarxistin û hejmarek nivîskar, rewşenbîr, siyasetmedar, nûnerên komên baweriyan ên ji Başûrê Kurdistanê û bajarên Iraqê  hatine vexwendin. Her wiha wê meclîsên gel ên Şengalê, TAJÊ, tevgera ciwanan, PADÊ, rûsipiyên civakê û gelek sazî û dezgehên Rêveberiya Xweser beşdarî komxebatê bibin. Ji derveyî kes û saziyên ku hatine vexwendin, derî ji her kesek bixwaze beşdar bibe re jî vekirîbe.

 

Wê komxebat rojekê berdewam bike û hewl bide pirsgirêkên demokrasî û azadiyê yên li Iraqê diqewimin û li gorî fikrên Abdullah Ocalan çareserî were destgirtin.

 

Mijarên esasî ku wê di komxebatê de werin guftugokirin jî wiha ne;

 

*Pirsgirêkên Iraqê û herêmê, çareseriya van pirsgirêkan di neteweya demokratîk de

 

*Danasîna projeya Xweseriya Demokratîk

 

*Beriya fermanê û piştî fermanê tevgera jin û ciwanan

 

*Li ser esasê parastina cewherî, parastina gelan