NAVENDA NÛÇEYAN - Kurdistaniyên li Bernê dijîn, ji bo balê bikşînin  ser tecrîda li ser Rêberê PKK’ê Abdullah Ocalan çalakiyek li dar xist û dosyayek radestî Rêxistina Efûyê ya Navneteweyî kir.

 

Kurdên li Kantona Bernê ya Swîsreyê dijîn, li ber Bern Bahnhofê hatin ba hev û tecrîda li ser Rêberê PKK’ê Abdullah Ocalan protesto kirin. 

 

Hevseroka Komeleya Çanda Kurd a Bernê Mîne Çetînkaya di çalakiyê de axivî û destnîşan kir ku di serî de CPT, saziyên mafên mirovan durû ne. Çetînkaya anî ziman ku Abdullah Ocalan rêberê gelê Kurd e û got: “Gelek ê ku Rêberê wî girtî be, ew jî girtî ye.” 

 

Piştre Parlamenterê HDP’ê yê Amedê Mûsa Farisogûllari axivî û diyar kir ku Abdullah Ocalan ev 24 salin di nava 4 dîwaran de ye û da zanîn ku tecrîd berdewama komploya navneteweyî ye. Musa her wiha got divê gelê Kurd li her derê li dijî vê tecrîdê rabin û banga mezinkirina têkoşîna ji bo azadiya Abdullah Ocalan kir. 

 

Piiştî xwendina daxuyaniyê, li ser navê çalakvanan komekê dosyayek têkildarî tecrîdê radestî Rêxistina Efûyê ya Navneteweyî (Ammesty Înternatîonal) kir.