NAVENDA NÛÇEYAN - Platforma Rojnamgerên Jin a Mezopotamyayê, Roja Rojnamegerên Kurd ên Jin pîroz kir û got, "Di serdemeke ku tê xwestin civak di tarîtiyê de bê hiştin em jinên kurd pêşeroja civaka xwe ronî dikin."

 

Platforma Rojnamegerên Jin a Mezopotamyayê (MKGP), bi daxuyaniyeke nivîskî ku weşand 7'ê Cotmehê Roja Rojnamegerên Kurd ên Jin pîroz kir. Di daxuyaniyê de hat gotin ku lêgerîna heqîqtê ya ji Rojnameger Gurbetelî Ersoz ji jinên kurd ên rojnameger re mîrate maye wekî duh îro jî rêya wan ronî dike. 

 

Berdewamiya daxuyaniya MKGP'ê wiha ye:

 

"Polîtîkayên qirkirinê yên li ser Gelê Kurd ku ji aliyê îqtîdaran ve tên meşandin îro jî bi rêbazên cuda cuda berdewam dikin. Em jinên kurd ên rojnameger, lêgerîna xwe ya heqîqetê ku me tevî binçavkirin û girtinan ji pêşiyên xwe dewr girtiye em ê ji îro û şûnde jî bidomînin. Em careke din dibêjin ku di serdemeke ku tê xwestin civak di tarîtiyê de bê hiştin em jinên kurd ên rojnameger pêşeroja civaka xwe ronî dikin.

 

Tevî derfetên kêm, ji bo ku em bibin dengê jinan û civakê ji roja ku em derketine qadan û heta îro me têkoşîneke mezin daye. Lê em dizanin ku ev ne bes e û divê em her di nava têkoşînê de bin. Ji ber vê em ê her bibin dengê gel, jin, zarok û gelên bindest."  

 

Piştî daxuyaniyê 7'ê Cotmehê Roja Rojnamegerên Jin ên Kurd li jinên rojnameger hat pîrozkirin û rojnamegerên jiyana xwe ji dest dane hatin bîranîn.