Peyama Abdullah Ocalan a ji bo ciwanan: Li her derê xwe birêxistin bikin
- 21:01 3 Nîsan 2025
- Rojane
RIHA - Abdullah Ocalan ji ciwanan re nameyek şand û diyar kir ku meşa ciwanan ji bo meşa azadiyê ye û wiha peyam da: “Ji ber vê yekê hûn ê li her derê xwe rêxistin bikin.”
Meclisa Ciwanên Partiya Wekhevî û Demokrasiyê ya Gelan (DEM Partî) bi boneya 76’emîn rojbûna Rêberê Gelê Kurd Abdullah Ocalan ji Amedê heta Amara meşiyan. Di roja 3’yemîn a meşê de ciwan wê beşdarî mîhrîcana ku ji aliyê Tevgera Jinên Azad (TJA) ve li Xelfetiyê tê organîzekirin, bibin.
Meclisa Ciwanên DEM Partiyê jî wê peyama Rêberê Gelê Kurd Abdullah Ocalan ji ciwanan re parve bike.
Peyama Abdullah Ocalan wiha ye:
"Meha nîsanê ji bo min Ronesans e, ji nû ve zayin e. Meşa ciwanan meşa ber bi azadiyê ve ye. Meşa ber bi azadiyê ve watedar e. Her ku diçim ez xwe birêxistin dikim. Dema ez diçûm dibistanê komeke min hebû ku bi min re tev digeriyan. Bi vî rengî civakbûn çêdibe. Ji zarokatiya xwe ve ez vî karî dikim.
Sosyalîzm tê wateya civakîbûnê. Pêwîst e li Kurdistanê bi vê ferasetê siyaset bê meşandin. Ji vê re dibêjin siyaseta sosyalîst. Ev yek bi rêxistinbûnê pêkan e. Rêxistin karê herî girîng e. Ji ber vê yekê hûn ê li her derê xwe birêxistin bikin.
Ez piştgiriya xebata we dikim û silavên xwe dişînim.”
Abdullah Ocalan
31.03.2025
Girava Îmraliyê."
Peyama bi Kurdî û Tirkî ji aliyê endamên Meclîsa Ciwanan ve hate xwendin. Dema ku peyam hate xwendin girseya gel dest bi qîrîna dirûşmên "Bijî Serok Apo" kir. Meşale hatin pêxistin. Dema ku peyam bi dawî bû, ji qadê slogana “Silav silav ji Îmraliyê re hezar silav” hat berzkirin. Piştî ku peyam hat xwendin ciwanan govend gerandin.
