STENBOL - Koordînasyona Jinên Ciwan a HDP’ê fînala kampanya ‘Niha seferberiya xemrî’ wê di 5’ê Adarê de bi dawî bike. Endama Koordînasyonê Esengul Kiliç diyar kir ku jin dizanin serdestiya mêr qadên azadiyê tune kirine û wiha got: “Em li fezayê û her derê ne. Em ê serdestiya mêr têk bibin. Em ê 8’ê Adarê li qadan bin.”

 

Koordînasyona Jinên Ciwan a HDP’ê Di Kanûna 2020’Î de kampanyaya ‘Niha seferberiya xemrî’ ku li dijî destdirêjî, tecawiz, qetilkirin û serdestiya mêr dabû destpêkirin, biryar dabû ku heta 8’ê Adarê Roja Jinan a Cîhanê wê bidomîne. Di çarçoveya kampanyayê de li ser onlîne û rû bi rû gelek bername hatin çêkirin. Jinên Ciwan dan zanîn ku wê kampanya xwe di 5’ê Adarê de li Mêrdînê bi dawî bikin. Endama Koordînasyona Jinên Ciwan a HDP’ê Esengul Kiliç da zanîn ku hatina gel hev a jinan hêvî û baweriyê diafirîne.

 

‘Jin li atolyeyan dîroka berxwedanê fêr dibin’

 

Esengulê destnîşan kir ku kampanya ji meha Kanûnê de didome û di çarçoveya kampanyayê de amadekariyên 8’ê Adarê jî hene û wiha pê de çû: “Me pêvajoya pandemiyê veguhert derfetê û me gelek atolyeyên onlîne pêk anîn. Êrîşên li hember jinan îdeolojîkin. Em atolyeyên xwe li ser nasîna zîhniyeta serdest ya mêr, li ser fêrkirina dîroka berxwedana jinê pêk tînin. Her wiha Meclîsa Jinan a HDP’ê jî tevlî plansaziyên me bû, hêz da me.”

 

‘Jin bi hev re hêvî û baweriyê diafirînin’

 

Esengulê her wiha daxuyakirin ku di çarçoveya kampanya ‘Niha seferberiya xwemrî’ de di atolyeyên pêk anîne de bi parvekirina çîrokên jinan re zîhniyeta serdest ya mêr derketiye holê û li ser vê xebat hatine kirin û ev tişt anî ziman: “Ev aşkera tê dîtin. Li aliyekî malbat, li aliyekî civak û li aliyekî dewlet êrîş dike. Ji ber vê em nikarin xwe bigihînin hev. Jİ ber vê jî ne tenê jinê tevlî bernameyên me dibin, em jî hêzê digirin. Jin bi hev re hêvî û baweriyê diafirînin.”

 

‘Me nûbûnek hîs kir’

 

Esengulê destnîşan kir ku di encama tecrubeyên kampanyayê de jin zêdetir hatine gel hev û wiha pê de çû: “Di bernameyan de hat dîtin ku jin bi awayekî azad jiyana xwe nikarin bidomÎnin. Lê di hevdîtinan de hat dîtin ku hewcedarî bi nûbûnekê heye.”

 

‘Em li fezayê ne û li her derê ne’

 

Esengulê daxuyakirin ku wê fînala kampanyayê di 5’ê Adarê de li Mêrdînê bi bernameyekê bi dawî bikin û got ku dirûşma wan jî ‘em li fezayê ne û li her derê ne, em ê serdestiya mêr têk bibin’ e. Esengulê wiha dawî lê anî: “Tayyîp Erdogan gotibû ‘ji nav jinan jî namzetên dibêjin em diçin fezayê hene’. Ev dirûşma me li ser vê pêş ket. Di esasê de em li her derê ne. Destkeftiyên jinan hene, serkeftinên jinan hene. Lê nayê xwestin ku ev bên dîtin. Em jinên rêxistinkirî di esasê de hêza xwe nîşan didin.Em ê jinên ciwan bi coşek mezin derkevin qadên 8’ê Adarê. Divê êdî em li her qada jiyanê alternatîfan bihûnin. 8’ê Adarê dikare ji bo me bibe destpêk.”

 

‘Em  bi hev re têdikoşin’

 

Esengulê her wiha balkişand ser bernameya fînala kampanyayê ya wê li Mêrdînê pêk bê û got: “Her jina dixwaze tevlî bibe ji ser hesabê twîtterê yê Jinên Ciwan ên HDP’yî dikarin xwe bigihînin me. Sedsala 21’ê wê bibe sedsala şoreşa jinê. Ez banga têkoşînê li hemû jinan dikim.”