Sara Efrîn

 

HELEB - Jina bi navê Werda Elî Ismayîl a ku ji xwezayê hez dike û di mala xwe de baxçeyek bi keda destên xwe ava kiriye wiha got: " Xwezaya xweş û paqij ji bo tenduristiya mirovan gelek baş e. Min baxçeyek ji xwe re ava kir û di heman demê de az ajalan jî xwedî dikim. Dema em li xwezayê xwedî derkevin dê xweza jî li me xwedî derkeve."

 

Dayika bi navê Werda Elî Ismayîl a 47 salî ye û li taxa Şêx Meqsûdê ya bajarê Helebê dijî, ji ber rewşa şer û aloziya Sûriyeyê bajarê wan hat wêrankirin. Werdayê bi zarokên xwe re baxçeyek di mala xwe de çêkir û tevahî rengên kûlîlk û zeviyan di nava vî baxçeyî de vehewandiye. Werdayê da zanîn ku xweza parvekirinê jî bi mirovan dide hînkirin û wiha got:"Li baxçeyê xwe em û cîranên xwe kom dibin û em bi hev re parvekirinên germ dikin. Ev yek dibe sedem ku têkiliya di navbera me de jî xurt bibe."

 

'Xwezaya xweş û paqij ji bo tendrustiya mirovan jî gelek baş e'

 

Werdayê bi lêv kir ku dema bajarên wan hatiye wêrankirin ew gelekî xemgîn bûye û wiha got: "Ji ber sedema rewşa şer a li herêmê, bajarê me hemû hat wêrankirin, parkên me neman, lê min û zarokên xwe bi hev  re baxçeyekî biçûk çêkir û tevahî cîran tên û em li hev kom dibin. Di baxçeyê me de hemû rengên kûlîlka heye û her dem ez kulîkên nû diçînim. Ji ber ku xwezaya xweş û paqij ji bo tendrustiya mirovan jî gelek baş e." 

 

'Xweza û ajal divê bên parastin' 

 

Werdayê da zanîn ku ew ajalan jî  xwedî dike û wiha dawî li axaftina xwe anî: "Ji ber ku ez bi xwezayê pir girdayîme û hezkirina min jêre heye ez ajalan jî xwedî dikim. Berhemên van ajalan jî pir in, ez sûdê jê digirim. Her sibeh zû diçim nav ajalên xwe. Ew jî gelekî ji me hez dikin. Xweza û ajal divê bên parastin."

 

'Xweza tune be em jî tune ne'

 

Keça Werdayê Sozdar Elî jî wiha got: "Bi çandiniyê jiyana me xweştir û geştir bû, her roj di nav zeviyan de digerim, av didim. Ji çandiniyê jiyanek nû me afirandiye. Em ji  xwezayê û parastina xwezayê gelek hez dikin. Çimkî xweza tune be em jî tune ne."