XARPÊT - Bi daxwaza naskirina statuya Bakur û Rojhilatê Sûriyeyê li navçeya Depê daxuyanî hate dayin. 

 

Di çarçoveya kampanyaya “Ji Rojava re statu ji bo gelan azadî” de ku bi daxwaza naskirina statuya Bakur û Rojhilatê Sûriyeyê hatiye destpêkirin, li navçeya Depê ya Xarpêtê daxuyanî hate dayin. Daxuyanî, li ber avahiya DEM Partiyê ya navçeyê hat dayin û gelek partiyî tev li bûn. 

 

Rêveberê Rêxistina DEM Partiyê yê Xarpêtê Îskender Şîmşek bertek nîşanî êrişên ser Bakur û Rojhilatê Sûriyeyê da. Îskender Şîmşek, got: “Aştî û edalet, tenê bi wekheviya gelan pêkan e. Divê tavilê aştiyeke ku gelê Kurd û gelên din xwedî heman mafan pêk bê. Heta polîtîkayên şer neyên terikandin ne li Sûriyeyê ne jî li Tirkiyeyê mimkin nîne.” 

 

Îskender Şîmşek, axaftina xwe wiha qedand: “Divê tavilê komkujiyên li ser Rojava bên sekinandin. Divê polîtîkayên şer bên terikandin. Divê ji bo îradeya gelan rêzgir bin û ji bo pergaleke ku hemû gel xwedî mafên wekhev, pergaleke aştiyane gav bên avêtin.” 

 

Daxuyanî piştî çalakiya rûniştinê bi dawî bû.