AMED - Berdevka Meclîsa Jinan a DEM Partiyê Halîde Turkoglu jinên ku bi KHK'ê ji kar hatine avêtin re civiya û got: "Divê daxwazên jinan di rêziknameyan de ji mafê sendîkayî bigire heya qanûna partiyên siyasî werin qebûlkirin."

 

Berdevka Meclîsa Jinan a Partiya Wekhevî û Demokrasiyê ya Gelan (DEM Partî) Halîde Turkoglu li Amed bi jinên ku bi Biryarnameyên Qanûnî (KHK) ji kar hatine avêtin re civiya. Di civînê de bandorên KHK'yan li ser jinan, pêvajoya aştî û civaka demokratîk û daxwazên jinan hatin nîqaşkirin.

 

Halîde Turkoglu di civînê de axivî û diyar kir ku pêvajoyên darbeyê yên li Tirkiyeyê jinan hedef digirin û pêkanînên KHK'yan cureyek nû ya şîdetê ne. Halîde Turkoglu bi bîr xist ku ew bi xwe bi KHK'yan ji kar hatiye avêtin û got, "Meseleya biryarnameyan jî belgeyek zîhniyeta dij-demokratîk û darbekar a vî welatî ye."

 

Halîde Turkoglu tekez kir ku çareseriya pirsgirêka Kurd û pêvajoya demokratîkbûnê divê bi hev re werin nirxandin û diyar kir ku têkoşîna ji bo aştî, edalet, wekhevî û rizgariya jinan nayê cudakirin. Halîde Turkoglu destnîşan kir ku jin bi salan e di têkoşînan de ne û wiha axivî:"Ger pêvajoyek aştiyê hebe, em mijarên vê pêvajoyê ne. Em mijarên aştiya civakî ne. Em mijarên edalet û demokrasiyê ne."

 

Halîde Turkoglu diyar kir ku di nav Meclîsa Jinan a DEM Partiyê de Komîsyona Qanûna Jinan hatiye damezrandin û got ku komîsyon ne tenê dê bi dozên dadgehê re mijûl bibe, lê di heman demê de dê ji perspektîfa jinan ve jî nêzî pêvajoya demokratîkbûnê bibe. Wê tekez kir ku divê daxwazên jinan di rêziknameyan de ji mafê sendîkayî bigire heya qanûna partiyên siyasî werin qebûlkirin û girîngiya berfirehkirina têkoşîna rêxistinkirî ya jinan destnîşan kir.