MEREŞ - Berdevka HDP'ê Ebrû Gunay li ser gora siyasetmedara jin Fîdan Dogan axivî. Ebrû diyar kir ku ew ê hesap ji kujeran bipirsin û got, "Wê vê jî têkoşîna me jinan û felsefeya 'Jin jiyan azadî' pêk bîne."

 

 Nûnera Kongreya Netweyî ya Kurdistan (KNK) a Parîsê Fîdan Dogan (Rojbîn) a ku li gel yek ji damezrînerên PKK'ê Sakîne Cansiz (Sara) û endama Tevgera Ciwanên Kurd Leyla Şaylemez (Ronahî) li paytextê Fransa Parîsê hat qetilkirin, li taxa Xopon a naveçeya Elbîstanê ya Mereşê li ser gora xwe hat bîranîn.

 

Berdevka Partiya Demokratîk a Gelan (HDP) Ebrû Gunay, Meclisa jinan a HDP'ê, parlamentera HDP'ê ya Rihayê Ayşe Surucu, Meclisa Dayikên Aştiyê û  aktîvîstên Tevgera Jinên Azad (TJA) tevli merasîma bîranînê bûn. Bîranîna ku xizmên Fîdanê jî tevli bûn bi merasîmê dest pê kir.  

 

'Em hêzên li pişt tekîkêşan nas dikin’

 

Berdevka HDP’ê Ebrû Gunay di merasîmê de axivî û wiha got: “Weke rêhevalên Fîdan, Sakîne û Leylayê, em wan li quntarê Nûrheqê bi bîr tînin. Komkujiya ku 10 sal berê hatibû kirin hêjta nehatiye ronîkirin. Tu gotin û sal bi têrî vegotina hevalên me nakin. Her yek ji van rêhevalên me nûnerên girîng ên jinên kurd bûn. Me dizanî ku îktîdar ji têkoşîna jinên kurd gelek ditirse lê ev tirs veguherî qetilkirina jinên kurd a bi hovane. Ev 10 sal in em dizanin bê ka kîjan hêz li pişt tetîkkêş in. Jinên kurd û rêhevalên wan pir baş dizanin. Dewletan bi girtina tetîkkêşan re gotin ku cînayet ronî kirine lê em dizanin ku faîlên rast hêj hesab nedane. Heke em bixwazin pêşî li ber komkujiyên nû bigirin, divê em hêzên li pişt tetîkkêş derxînin holê û hesabê jê bipirsin. Di qeydên ku li ser çapemeniyê hatine parvekirin de faîlên rasteqîn ji xwe xuya dibin lê hêj nehatine dîtin. Kujerên rast hatin veşartin. Em jin bi rastiyan dizanin û dê hesabê bipirsin.” 

 

'Ger komkujiya yekemîn bihata ronîkirin dê ya duyem nebûya’ 

 

Di berdewamê de Ebrû got ku bîranîna 9’ê Çileyê girîng e û wiha pê de çû: “Heke ev cînayet 10 sal berê bihata ronîkirin, dê 2’yemîn Komkujiya Parîsê ku du hefteyan berê hate kirin pêk nehata. Heke ji kujerên Sakîne, Leyla û Fîdanê û ji hêzên pişt tetîkkêşan hesab bihata pirsîn dê ev cînayetên din nehatina kirin. Lê dost û dijmin her kes pê dizane ku jinên kurd ji tu zext û komkujiyan netirsîn û dê netirsin. Jinên kurd di têkoşîna xwe de tu carî paşvegav neavêtin. Sekna Sakîne Cansiz a li Zindana Amedê mînaka vê ya herî şênber e. Em vê rastiyê ji Fîdanê dizanin ku tevî hemû polîtîkayên pişaftinê jî li derveyî welat dijiya, em ji Leylayê dizanin ku têkoşîna ciwanan dimeşand. Hemû cîhan îro bi dirûşma ‘Jin, jiyan, azadî’ ku sembola têkoşîna jinên kurd e li ber xwe didin. Dewlet çiqas qirêjî dibin bila bibin lê nikarin xwe li pêşiya jinên ku biryara berxwedanê dane bigirin. Zû yan jî dereng ev heqîqet teqez dê derkeve holê û faîlên wan her sê jinên kurd hesabê bidin.”

 

'Em ê heqîqetê derxînin holê’

 

Bi domdarî Ebrû wiha got: “Dê kujerên Sevê, Fatma, Pakîze û Evîn Goyî hesabê bidin. Me soz da ye hevalên xwe ku dê heqîqetê derxînin holê. Dê hesaba her hevaleka me ya hatiye qetilkirin bipirsin. Ev yek jî dê bi saya têkoşîna jinan û bi felsefeya ‘jin, jiyan, azadî’ bibe. Em bi saya biryardarî, birêxistinî û têkoşîna xwe van cînayetan ronî bikin. Di serî de bo Fîdanê, ez bo kesên li Parîs û Silopiyayê hatine qetilkirin soz didim ku dê xeyala wan pêk were. Dê jinên kurd ên azad li ser vê xakê azad bijî û civaka demokratîk ava bike. Em ji we hînî avakirinê bûn. Dê dilsoziya me ya bi we re bibe parastina dirûşma ‘jin, jiyan, azadî.’ Di şexsê Sakîne, Leyla û Fîdanê de ez hemû jinên di têkoşîna azadiyê de jiyana xwe ji dest dane bibîr tînim. Bila ruhê we şad be ji ber ku dê berxwedana ‘jin, jiyan, azadî’ bijî.” 

 

Piştî axaftinan jî girseyê dirûşmên “Şehîd namirin” û “Jin, jiyan, azadî” berz kirin. Piştre jî beşdaran şalên mor û qurnefîl danîn ser gora Dogan û bîranîn bi dawî bû.