Serdanên Şandeya Platforma Jinên Kurd li Silêmaniyê berdewam dike

  • 08:40 14 Kanûn 2022
  • Rojane
NAVENDA NÛÇEYAN  - Şandeya Platforma Yekîtiya Jinên Kurdistan ya bakurê Kurdistanê di çarçoveya hevdîtinên xwe de li Silêmaniyê serdana sazî û partiyên siyasî dike. Di serdanan de jinan bal dikişinin ser yekitî û têkoşîna hevpar. 
 
Şandeyek bakurê Kurdistanê ku ji komek parlamenter, endamên aliyên siyasî, akademisyen û endamên Yekîtiya Jinên Kurd pêk tê, serdana başûrê Kurdistanê kir. Şandeya ji parlamentera Partiya Demokratîk a Gelan (HDP) Nuran Îmîr ku di heman demê de endama Platforma Jinên Kurd e, cîgira Hevseroka Partiya Herêma Demokratîk (DBP) û Endama Platforma Yekîtiya Jinên Kurd Gulşen Sincar, akademisyen Evîn Adîn, endama Partiya Azad ya Kurdistanê Zeyneb Dîncer pêk tê.  Şande piştî ku li Hewlêrê hevdîtinên xwe pêk anî derbasî Silêmanî bû. 
 
Duh Piştî saetên nîvro şande li Silêmaniyê serdana jinên Tevgera Goran kir. Şande ji aliyê Seroka Şandeya Tevgera Goran Nesrîn Cemal û Seroka Koma Tevgera Goran a li Parlementoya Kurdistanê Gulistan Seîd ve hat pêşwazîkirin. Civînê zêdetirî saetek dom kir, piştre Seroka Şanda Platforma Yekîtiya Jinên Kurdistan ya ji Bakurê Kurdistanê Nuran Îmîr ji çapemeniyê re axivî û got: “Bi armanca avakirina platformek giştî jinên her çar parçên Kurdistanê me îro serdana Tevgera Goran kir.”
 
Nûran, behsa serhildana Rojhilatê Kurdistan a bi pêşengtiya jinan berdewam dike jî kir û wiha bi lêv kir: “Divê em vê xebata jinan wek mînaka têkoşînek nû ji bo jinan bigrîn dest.”
 
Her wiha Seroka Şande Tevgera Goran Nesrîn Cemal jî axivî, di destpêkê de keyfxweşiya xwe ya ji seredanê re anî ziman û wiha got: “Wek jinên Tevgera Goran em ê di nava xwe de li ser daxwaza jinên Bakurê Kurdistanê ya ji bo pêkanîna platformek giştî ya jinên her çar parçên Kurdistanê bicivin.”
 
Di saetên êvarê de jî şande serdana jinên Tevgera Azadî û Rêxistina Jinên Azad ên Kurdistan (RJAK)’ê kir. Şandeya jinên Bakur ji aliyê Endama Hevserokatiya Tevgera Azadî Sara Reza û jinên din ên Tevgera Azadî ve hat pêşwazîkirin. Di serdanê de li ser karkirina hevbeş a jinên her çar parçên Kurdistanê ya ji bo avakirina yekitiya jinên kurd axivîn.
 
Piştre şande bi heman armancê serdana navenda RJAK’ê kir. Di serdana RJAK’ê de jî li ser giringiya têkoşîna jinên kurd, pêkanîna yekitiya jinên kurd û têkoşîna jinan a li dijî hişmendiya zilamsalarî û desthildatdariyê axivîn.  Wê Şandeya Platforma Yekîtiya Jinên Kurdistan ya Bakurê Kurdistanê îro jî li Silêmaniyê seredanên xwe yên ji bo partî û rêxistinên jinan berdewam bike.