NAVENDA NÛÇEYAN - Li gorî rapora Rêxistina Efûyê ya Navneteweyî (Amnesty International) a li ser cezayê mirinê ya salane, sala 2024'an hejmara kesên li cîhanê hatin darvekirin li gorî salek berê ji sedî 32 zêde bû.

 

Li gorî rapora bi sernavê Cezayê Darvekirinê û Înfaz a 2024'an ku ji aliyê saziyê ve hate weşandin, di sala 2024'an de 1.518 kes bi cezayê darvekirinê hatin înfazkirin. Ev hejmar li gorî salek berê zêde ye, ku di sala 2023'an de 1.153 kes hatin darvekirin.

 

Di raporê de hate ragihandin ku 637 kes ji ber sûcên narkotîkê hatin darvekirin û ev yek ji sedî 42 ê hejmara darvekirinê ye. Rêxistina Efûyê ya Navneteweyî diyar kir ku ev kiryar li dijî mafên mirovan e.

 

Li gorî raporê piraniya darvekirinên sala 2024'an li Îran, Iraq û Erebistana Siûdî bû. Hate ragihandin ku di sala 2023'an de li van hersê welatan 1.041 kes, di sala 2024'an de 1.380 kes hatin darvekirin. Rêxistina Efûyê ya Navneteweyî got, ji sedî 91 ê darvekirinên di asta navneteweyî de li van hersê welatan hate kirin.

 

Rêxistinê her wiha ragihand ku li Çîn, Koreya Bakur û Vîetnamê ji ber sirên dewletê û astengiyên li pêşiya agahîwergirtinê, daneyên giştî li cîhanê bi têrkerî nayê tespîtkirin.

 

Di raporê de her wiha işaret bi hin rewşên erênî jî hate kirin. Li gorî vê yekê Zambiya, tevlî protokola rakirina cezayê darvekirinê ya navneteweyî bû û Zîmbabwe jî cezayê darvekirinê yê ji bo 'sûcên normal' rakir. Her wiha di biryara rawestandina bikaranîne cezayê darvekirinê de ya li Civata Giştî ya Neteweyên Yekbûyî pêşkêşî dengdanê hate kirin, ji sê paran du parên dewletên endamên Neteweyên Yekbûyî dengê erênî dan.