NAVENDA NÛÇEYAN - Di 7’emîn salvegera dagirkirina Efrînê de li seranserî Bakur û Rojhilatê Sûriyeyê gel daketin qadan û her wiha şêniyan komkujiya li Kobanê şermezar kirin. Di çalakiyan de banga vekirina lêpirsîneke navneteweyî li ser sûcên Tirkiyeyê kir.

 

Di 7’emîn salvegera dagirkirina Efrînê de, şêniyên Herêma Bakur û Rojhilatê Sûriyeyê bi çalakiyên cuda hat şermezar kirin. Şêniyan di çalakiyan de komkujiya Tirkiyeyê  ya li dijî malbateke bajarê Kobanê şermezar kir û banga destpêkirina lêpirsîna navneteweyî der barê wê komkujiyê de, kir.

 

Hesekê 

 

Li bajarê Hesekê bi dehan şêniyên bajêr û koçberên Efrînê li pêşiya dêra Aşûrî ya taxa Til Hecer kom bûn û li wir hevserokê Meclisa bajarê Hesekê Farûq Tozo daxuyaniyek da.

 

Di daxuyaniyê de êrîşên Tirkiyeyê û her wiha komkujiya ku Tirkiyeyê li dijî malbata Osman Berkel a bajarê Kobanê, kiriye hat şermezarkirin û bang li civata navneteweyî hat kirin ku sûcên dewleta Tirk a şermezar bike.

 

Koçberên Efrînê yên li Seken Şebabî ya bajarê Hesekê bi daxuyaniyekê guhertina demografî ya ku Tirkiyeyê bi riya koçberkirina şêniyan û bicihkirina malbatên biyanî li şûna wan a ku li Efrînê dide meşandin şermezar kir.

 

Koçberan bang li rêxistinên navneteweyî û desthilata Şamê kir ku ji bo vegerandina ewle ya koçberên Efrînê bixebitin û zextê li Tirkiyeyê bikin da ku guhertina nasnameya herêmê rawestîne.

 

Serêkaniyê

 

Meclisa Malbatên Şehîdan a bajarê Serêkaniyê ji kampa Serêkaniyê daxuyaniyek da û tê de sûcên Tirkiyeyê bi taybetî komkujiya dawîn a li gundê Berxbotanê ku di encamê de 9 endamên malbatê şehîd bûn hatin şermezarkirin.

 

Di daxuyaniyê de bang hat kirin ku der barê sûcên Tirkiyeyê  ên li dijî sivîlên Bakur û Rojhilatê Sûriyeyê de, lêpirsîneke navneteweyî vekin.

 

Dirbêjiyê

 

Li bajarê Dirbêsiyê Partiya Yekitiya Demokratîk (PYD) û Yekitiya Xwendekarên Demokratîk bi 2 daxuyaniyan sûcên Tirkiyeyê bi taybetî komkujiya dawîn a li dijî malbateke bajarê Kobanê şermezar kirin.

 

Di daxuyaniyan de hat diyarkirin ku êriş domandina siyasetên qirkirinê yên li dijî gelê Kurd nîşan didin û banga vekirina lêpirsîneke navneteweyî hat kirin.

 

Hol

 

Li bajarê Hol Meclsia Jinan a PYD'ê çalakiyek li dar xist û tê de sûcên Tirkiyeyê ên li dijî herêmê hatin şermezarkirin û bang li civata navneteweyî hat kirin ku hesabê ji dewleta Tirk  bixwaze.

 

Til Birak

 

Li Til Birakê Meclisa Malbatên Şehîdan bi daxuyaniyekê êrişên dewleta Tirk a dagirker şermezar kirin û bang li civata navneteweyî kir ku binpêkirinên li dijî xaka Sûriyeyê rawestîne.

 

Til Temir

 

Li bajarê Til Temirê bi 2 çalakiyên cuda komkujiya li Kobanê û dagirkirina Efrînê hatin şermezarkirin.

Di heman çarçoveyê de Yekitiya Jinên Ciwan a Til Temirê meşeke girseyî ji bo şermezarkirina komkujiyê û salvegera dagirkirina Efrînê li dar xistin.

 

Qamişlo

 

Kombenda Efrîn a Civakî ya bajarê Qamişlo jî li çerxerêya Efrîn bi beşdariya bi sedan koçberên Efrînê û şêniyên bajêr daxuyaniyek da û banga hesabxwestinê ji sûcdaran kir.