NAVENDA NÛÇEYAN - Di çalakiyên ku li Stenbol û Enqereyê hat lidarxistin de ji bo girtiyên nexweş daxwaza azadiyê hat kirin.

 

Komeleya Mafên Mirovan (ÎHD) ji bo balê bikişîne ser rewşa girtiyên nexweş, li Stenbol û Enqereyê çalakî li dar xist. 

 

Şaxa ÎHD’a Stenbolê bi heman boneyê her hefteyê çalakiya “Rûniştina F”yê li dar dixe. Şaxê, di hefteya 663’yan de li pêşiya avahiya xwe ya li Beyoglûyê daxuyanî da. Di daxuyaniyê de wêneyên girtiyên nexweş hatin hilgirtin û gelek caran dirûşmên “Tedawî maf e nayê astengkirin” û “Tecrîd dikuje piştevanî dide jiyîn” hatin berzkirin. Di çalakiya vê hefteyê de bal kişandin ser rewşa girtiya nexweş a 58 salî Melek Akgun ku ji sedî 82 astengdar e û li Girtîgeha Jinan a Bunyan a Kayseriyê tê ragirtin. 

 

Endamê komîsyona Girtîgehan a ÎHD’ê Taylan Bekîn da zanîn ku dilê Melek Akgun zeîf e, nexweşiya KOAH a kronîk, nexweşiya gurçikan, Romatoid Artrit, helîna hestiyan, jicihçûna hestiyên piştê, nebihîstin, nedîtin û hwd. ên Melek Akgunê hene. Di heman demê de peyama keça Melek Akgunê ji komîsyonê re şandî jî hate xwendin. 

 

Keça Melek Akgunê di nameyê de nexweşiyên dayika xwe yek bi yek vegot û got ku divê dayika wê her tim bê tedawîkirin lê ji ber şert û mercên girtîgehê nikare baş tedawî bibe, heke di şertên girtîgehê de bimîne dibe ku hestiyên wê bişikên û gurçikên wê bi temamî îflas bikin, nexweşiya wê ya qelewiyê pêş dikeve û divê dayika wê bi awayekî negirtî were darizandin û banga berdana dayika xwe kir. 

 

Ji Enqereyê bang

 

Înîsiyatîfa Azadî ji Girtiyên Nexweş re jî di hefteya 535’an de li ser Cadeya Sakaryayê ya Enqereyê daxuyanî da. Di daxuyaniyê de pankarta “Tedawî maf e nayê astengkirin” hate hilgirtin. Gelek kes tev li daxuyaniyê bûn. Hevserokê Şaxa ÎHD’a Enqereyê Omer Faruk Yazmaci bal kişand ser rewşa girtiyê nexweş Emrah Abî ku li Girtîgeha bi Ewlekariya Bilind a Antalyayê tê ragirtin. Omer Faruk Yazmaci, da zanîn ku Emrah Abî ji zarokatiya xwe ve nexweşê dil e, di 20’ê gulana 2002’yê de li Nexweşxaneya Îhtîsasa Bilind a Wanê emeliyeta dil a vekirî bûye û platîn xistine derîçeyê dilê wî. 

 

'Rapora wî ya astengdariyê heye' 

 

Omer Faruk Yazmaci, destnîşan kir ku heke kontrol û tedawiya Emrah Abî neyên kirin dê ev yek rê li rijîna xwînê ya ser mejî veke û xetereya mirinê bi xwe re bîne. Omer Faruk Yazmaci, da zanîn ku ji ber nexweşiya dil, rapora Emrah Abî ya “ji sedî 55 astengdar e” heye û wiha domand: “Piştî girtîgehê, nexweşiyên weke fitqa piştê, fitqa stû, êşên gehikan, menuskus, ulser û hwd. lê peyda bûne.” Yazmaci, diyar kir ku şert û mercên girtîgehê bandoreke neyînî li ser tenduristiya Abî dikin û xwest ku Emrah Abî tavilê were berdan.