NAVENDA NÛÇEYAN - Kurdên li Ewropayê dijîn, li dijî êrişên bi çekên kîmyewî, li gelek bajaran çalakî li dar xistin û bêdengiya OPCW  û saziyên Ewropayî şermezar kirin. 

 

Ajansa Nûçeyan a Firatê (ANF) têkildarî bandora çekên kîmyewî yên ku artêşa tirk li dijî Herêma Federal a Kurdistanê bi kar tîne dîmenek parve kir. Di nûçeyê de tê destnîşankirin ku di nava 6 mehên dawî de Tirkiyeyê herî kêm 2 hezar û 476 caran bombe û çekên kîmyewî yên qedexe bi kar anîne. Piştî dîmenên ku hatin parvekirin kurdên li Ewropayê dijîn  daketin qadan û çalakiyên şermezarkirinê li dar xistin. 

 

Stûttgart 

 

Li bajarê Stûttgart ê Elmanyayê bi armanca şermezarkirina êrişên dewleta Tirk a faşîst a bi çekên kîmyewî li dijî qadên gerîla çalakiyek hate lidarxistin. Çalakî TJK-E’yê organîze kir. Kurd û dostên xwe, li qada Kobanê hatin ba hev. Di çalakiyê de bêyî navber dirûşma “Erdoganê terorîst“ hat berzkirin û bêdengiya Ewropayê li dijî êrîşan hat şermezarkirin.

 

Cenevre 

 

Kurdistanî û dostên wan ê li Cenevreyê dijîn, li dijî bikaranîn çekên kîmeyewî ya dewleta Tirk daketin qadan û meşek girseyî li dar xistin.Kurdistanî û dostên wan, bi pêşengiya Jinên Ciwan ên Têkoşer (Têko-JIN) û Tevgera Ciwanên Şoreşger, li ber postxaneya navendê hatin ba hev, ji bo teşhîr kirina bikaranîna çekên kîmyewî maske û cilên spî li xwe kirin û bi berzkirina dirûşmeyan dest bi meşê kirin.

 

Piştî meşê çalakger ketin hundirê îstasyona trenan a navendê û bi berzkirina dirûşmeyên xwedî derketina li berxwedana gerîla, dest bi çalakiya rûniştinê kirin. Hevserokê Navenda Civaka Kurd a Cenevreyê Erdal Atasoy axivî. Atasoy bal kişand ser pêvajoya dîrokî ya ji bo Kurdan û got: “Dewleta Tirk a dagirker li sûcên şer û dermirovî yên ji bo tunekirina destkeftiyên Gelê Kurd, dewam dike. Em dikevin pêvajoyeke dîrokî ya ji bo Gelê Kurd. Em ê li her derê bikaranîna gazên kîmyewî û bi jehr a ji aliyê dewleta Tirk ve, teşhîr bikin û li xwedî derketina li berxwedana gerîla, dewam bikin.” Erdal, diyar kir ku wê sibehê cardin li ber avahiya Neteweyên Yekbûyî (NY) sûcên şer û dermirovî yên dewleta Tirk teşhîr bikin û ev bang kir: “Em di serî de Gelê Kurd û dostên wan, bang li hemû derdorên demokrasiyê dikin ku tevlî çalakiya me ya îro bibin û bibin piştgirê Gelê Kurd.“

 

Çalakî bi berzkirina dirûşmeyan bi dawî bû.

 

London 

 

Bi banga TCŞ û TêkoJIN a Îngilistanê, ji bo protestokirina êrîşên bi çekên kîmyewî li ber Pirtûkxaneya Wood Green çalakiyek hat lidarxistin. Beriya çalakiyê di şexsê 17 gerîlayên bi çekên kîmyewî şehîd bûne de ji bo hemû şehîdên şoreşa Kurdistanê deqeyek rêz hat girtin. Li ser navê TCŞ’ê Çekdar Amara axivî. Amara diyar kir ku Tevgera PKK’ê, 50 sal in bi têkoşîna bêhempa û bi ruhê şehîdan, li dijî dijmin tawîz nade û da zanîn ku Tevgera Ciwanên Kurd a Şoreşger wê li dijî êrîşan xwe ker nekin. Amara destnîşan kir ku ew ê li ser bingeha şerê gel ê bi şoreşgerî, wê di birêvebirina çalakiyan de bi biryar bin.

 

Ercan Akbal li ser navê Meclîsa Gel a Kurd têkildarê êrîşan daxuyaniyek da. Akbal destnîşan kir ku Rêberê Gelê Kurd Abdullah Ocalan bi sekina xwe ya Rêbertiyê ya 50 salan, li Îmraliyê 23 sal in ku li ber xwe dide. Çalakî bi berzkirina dirûşmeyên “Bijî berxwedana gerîla”, “Bijî berxwedana PKK’ê”, “Artêşa Tirk, derkeve ji Kurdistanê” û “Dewleta Tirk a terorîst" dewam kir.

 

Çalakî bi gotina sirûda Çerxa Şoreşê bi dawî bû.

 

Grîngny 

 

Li banliyoya Grîgny ya Parîsa paytexta Fransayê, ciwanên TCŞ’ê li dijî êrîşên dagirkeriyê çalakiyeke protestoyî li dar xistin. Ciwanên bi pêşengiya TCŞ’ê hatin ba hev, wêneyên Rêberê Gelê Kurd Abdullah Ocalan û alên PKK’ê pankartên li ser şermezarkirina êrîşên bi çekên kîmyewî hildan. Meş, ji Navenda Civaka Kurd a Demokratîk ta bi Îstgeha Trenan a Navendî, nêzîkê saetek li ber xwe da.

 

Ciwanan, di çalakiyê de bêyî navber dirûşmên “Bimire xiyanet“ û “Bijî berxwedana gerîla“ berz kirin.

 

Marsîlya 

 

Li bajarê Marsîlya yê Fransayê, bi sedan kes bi banga DTM ya Marsîlyayê ji bo 17 gerîlayên bi çekên kîmyewî şehîd bûne li ber Nûnertiya Yekîtiya Ewropayê hatin ba hev û bi du saetan çalakiya rûniştinê li dar xistin. Kurd û dostên xwe, saet di 18.00’an de li ber Nûnertiya Yekîtiya Ewropayê hatin ba hev û pankartê wêneyên 17 gerîlayên li ser, bi ber nûnertiyê ve kirin.

 

Di çalakiyê de dirûşmên “Komara Tirkiyeyê ya kujer“  û “Komara Tirkiyeyê ya hov, Ewropaya hevkar“ hatin berzkirin.

 

Montpellîer û Dragûîgnan 

 

Ji bo protestokirina êrîşên bi çekên kîmyewî yên artêşa Tirk li qadên gerîla, gel li Montpellîer û Dragûîgnanê jî daket qadan. Di çalakiyên li her du bajaran hatin lidarxistin de, êrîşên bi çekên kîmyewî yên artêşa Tirk hatin şermezarkirin û banga derketina qadan li Kurdistaniyan hat kirin.

 

Dusseldorf

 

Li bajarê Dusseldorf ê Elmanyayê, bi pêşengiya YJK-E Dusseldorfê û Meclîsa Jinan a Asya Yuksel Dûîsbûrgê,  li ber îstgeha navendî ya trenan çalakiyeke protestoyî hat lidarxistin. Gelek Kurdên li Dusseldorf û Dûîsbûrgê tev li çalakiyê bûn û êrîşa dewleta Tirk a faşîst şermezar kirin.

 

Munîh 

 

Li bajarê Munîh ê Elmanyayê, bikaranîna çekên kîmyewî ji aliyê dewleta Tirk ve, bi çalakiyekê hat protestokirin. Çalakgerên li navenda bajêr hatin ba hev, bi deqeyekê rêz ji bo giyanê gerîlayên şehîd girtin. Di daxuyaniya bi Elmanî li çalakiyê hat xwendin de hat destnîşankirin ku bikaranîna çekên kîmyewî sûcek e li dijî mirovahiyê.

 

Di çalakiyê de, li ser hev dirûşma “Erdoganê kujer“ hat berzkirin.

 

Bern 

 

Kurdistanî li Bernê li dijî bikaranîna çekên kîmyewî daketin qadan.

 

Kurdistaniyên ku li Qada Bahnhof a Kantona Bern ê Swîsreyê hatin ba hev, êrişên bi çekên kîmyewî yên dewleta Tirkiyeyê ya li dijî Herêmên Parastinê yên Medyayê protesto kirin. Kurdistaniyan wêneyên 17 gerîlayên ku li Zap, Avaşîn û Metînayê di êrîşên kîmyewî de hatin qetilkirin hildan û bê navber dirûşmeyên “Bijî berxwedana gerîla” û “Bijî Serok Apo” berz kirin. Kurdistaniyên belavokên bi Elmanî yên têkildarî bikaranîna çekên kîmyewî ya ji aliyê dewleta Tirk a dagirker ve, belav kirin û enternasyonîstên Swîsreyî jî piştgirî dan Kurdistaniyan. Piştî deqeyek rêzgirtinê axaftin hatin kirin.

 

Kurdistanî bi berzkirina dirûşmeyan heta ber avahiya Parlamentoya Swîsreyê meşiyan.

 

Villiers Le Bel 

 

Bi banga Meclîsa Gel a Vîllîers Le Bel û TJK-F’ê bi sedan Kurdistanî li ber banliyoya Vîllîers Le Belê hatin ba hev û li dijî êrişên kîmyewî yên dewleta Tirk a li dijî Herêmên Parastinê yên Medyayê daketin qadan. Meş ji banliyoyê heta Navenda Civaka Kurd a Demokratîk dewam kir û di meşê de bê navber dirûşmeyên “Şehîd namirin”, “Bijî berxwedana gerîla”, “Bijî Serok Apo” û “Jin jiyan azadî” hatin berzkirin û li ber navendê bi daxuyaniyekê li çalakiya xwe dewam kirin.

 

Frankfûrt 

 

Kurdistaniyên li bajarê Frankfûrt ê Elmanyayê, bertek li dijî bikaranîna çekên kîmyewî nîşan dan. DKTM, YJK-E, Ciwanên Demokratîk ên Nû (YDG), Konfederasyona Karkerên Tirkiyeyî ya Ewropayê (ATÎK), Federasyona Karkerên Koçber a Elmanyayê (AGÎF), Partiya  Marksîst- Lenînîst a Elmanyayê (MLPD), Federasyona Demokratîk a Gelan a Elmanyayê (ADHF) ku li Haûptwache ya Frankûrtê hatin ba hev, bikaranîna çekên kîmyewî dewleta Tirk li Kurdistanê protesto kirin û bang li saziyên navneteweyî yên têkildarê mijarê kirin ku li dijî bikaranîna çekên kîmyewî tevbigerin.

 

Di daxuyaniyê de bal kişandin li ser bêdengiya OPCW  û saziyên Ewropayî û hat gotin ku dewleta Tirk, bi girtina siûdê ji vê bêdengiyê wê bi çekên kîmyewî li qirkirinê dewam bike. Kurdistaniyan destnîşan kir ku bi dîmenên ji li ser çapemeniyê hatine weşandin dilê mirov diêşe û banga rabûna bi erka xwe li OPCW’ê kirin.

 

Zurîh 

 

Bi banga Meclîsa Jinan a Bêrîtan û CDK Zurîhê, ji hemû pêkhateyan Kurdistanî û dostên wan di nava îstasyona trenê ya Navenda Zurîhê hatin ba hev û mîtîngek li dar xistin. Di çalakiyê de êrişên bi çekên kîmyewî ya dewleta Tirk a dagirker hat teşhîrkirin. Di çalakiyê de daxuyaniya bi Elmanî hat xwendin. Her wiha dirûşmeyên xwedî derketina li berxwedana gerîla hat berzkirin.

 

Basel

 

Kurd û dostên wan ên ku bi banga Navenda Civaka Demokratîk a Kurd (CDK) û Meclîsa Jinan a Ronahî li Claraplatzê hatin ba hev, bi çalakiya ku li dar xistin, xwedî li têkoşîna gerîla derketin û bikaranîna çekên kîmyewî ya dewleta Tirk protesto kirin.  Hevseroka CDK’ê ya Baselê Nejla Dersîm, di çalakiyê de axivî û got ku dewleta Tirk sûcekê şer ê din li dijî Kurdan kiriye û nabe ku mirov bêdengiya saziyên navneteweyî ya li dijî bikaranîna çekên kîmyewî ya dewleta Tirk, qebûl bike û wiha got: “Li ber çavên hemû cîhanê li Herêmên Parastina Medyayê, sûcên şer ên li dijî mirovahiyê tên kirin û li bikaranîna çekên kîmyewî û gazên bi jehrî tê dewamkirin. Em, bêdengiya saziyên navneteweyî û dewletan a li dijî van sûcên li dijî zarokên gelê Kurd, qebûl nakin. Em Kurdistanî û dostên kurdan, banga piştevaniyê ji bo Gelê Kurd li hemû der û dorên demokrasiyê dikin."

 

Piştî axaftinan dest bi çalakiya rûniştinê hat kirin û bi berzkirina dirûşmeyan çalakiya xwe bi dawî kirin. 

 

Kophenag 

 

Kurdistaniyên li Kopenhagê dijînli dijî sûcên şer ên ku dewleta Tirk li dijî gerîla bi bikaranîna çekên kîmyewî dike, li ber avahiya Neteweyên Yekbûyî mîtîngek li dar xistin. Di çalakiyê de bê navber dirûşmeyên “Bimire Erdoganê faşîst û mêtinger”, “Bijî berxwedana Werxelê û Avaşîn”, “Bikaranîna çekên kîmyewî sûcê şer e” û “Bêdeng mayîn sûc e, hevkariya sûc e” berz kirin.

 

Freîbûrg 

 

Li dijî sûcên şer ên ku dewleta Tirk bi çekên kîmyewî li dijî gerîla dike, Kurdên li bajarê Freîbûrg ê Elmanyayê û dostên wan, çalakiyeke protestoyî li dar xist. Saziyên navneteweyî jî li çalakiyê bûn. Di çalakiyê de dirûşmên “Erdoganê faşîst“, “Erdoganê kujer“ û “Bijî berxwedana gerîla“ hatin berzkirin.

 

Viyana 

 

Li Viyanaya paytexta Awûstûryayê, ji bo şermezarkirina qetilkirina 17 gerîlayan bi çekên kîmyewî, çalakiyek hat lidarxistin. Bi banga lidarxistina çalakiyan bi lezgînî, gelek çalakger ji navenda AGÎT’ê ya li Herrengasseyê heta bi Stephanplatzê meşiyan û bi berzkirina diruşman qetlîam şermezar kirin.

 

Hambûrg 

 

Ji bo şermezarkirina êrişên bi çekên kîmyewî yên dewleta Tirk a faşîst a li ser qadên gerîlayan, li Hambûrgê mîtîngek hat lidarxistin. Mîtîng, ji aliyê pêkhateyên Navenda Civaka Demokratîk a Hamûrgê û Meclîsa Jinan a Rojbîn a Hambûrgê ve hat lidarxistin û rêxistinên şoreşger ên Elman û Tirkiyeyê piştgiriya çalakiyê kirin. Mîtînga ku li ber îstasyona trenê ya Navenda Hambûrgê hat lidarxistin, ji bo bibîranîna gerîlayên hatine qetilkirin, bi deqeyek rêzgirtinê dest pê kir. Di daxuyaniya bi Elmanî hat xwendin de, hat diyarkirin ku bombeyên kîmyewî ji aliyê Ewropayê ve hatine çêkirin û hat gotin ku ew, hevkarên sûcên li dijî mirovahiyê ne.

 

Kurdistaniyên ku tev li mîtîngê bûn, wêneyên gerîlayan hildan û bê navber dirûşmeyên “Şehîd namirin”, “Bijî berxwedana gerîla” û “Kurdistan wê ji faşîzmê re bibe goristan” berz kirin. Mîtînga protestoyî, bi sirûda şoreşê bi dawî bû.

 

Bordoeaûx 

 

Li bajarên Bordoeaûx ê Fransayê, kurd li dijî êrişên kîmyewî rabûn ser pêyan. Kurdên ku bi banga lezgîn daketin qadan dirûşmeyên ku dewleta Tirk a dagirker şermezar dikin, berz kirin. Hat zanîn ku wê çalakiyên li Bordeoeaûxê heta saetên dereng ên şevê dewam bike.

 

Kîel 

 

Êrişên bi çekên kîmyewî yên dewleta Tirk a faşîst ên bi ser Kurdistanê de, li bajarê Kîel ê Elmanyayê hatin protestokirin. Kurdistan Solîdarîtät û Kurdîsche Gemeînde, çalakî organîze kir. Dîe Lînke, Defend Kurdistan, Komeleya Elewiyan a Kîelê, Kurdistanî û dostên wan Elman tev li çalakiyê bûn.

 

Çalakî, li ber îstgeha Trenan a Navendî ya Kîelê hat lidarxistin. Di axaftinên li çalakiyê hatin kirin de, hat diyarkirin ku dewleta Tirk a faşîst, zêdeyê du mehan e ku li Kurdistanê çekên kîmyewî bi kar tîne û di encama êrîşên li ser hev kirine de 17 gerîla qetil kirine. Di çalakiyê de her wiha hat destnîşankirin ku bikaranîna çekên kîmyewî sûcek e li dijî mirovahiyê û divê li dijî wê rayeke giştî ya navneteweyî bê avakirin.

 

Darmstadt 

 

Gelek Kurdên li Darmstadtê, li Lûîsenplatz a li navenda bajêr hatin ba hev û êrişên bi çekên kîmyewî yên dewleta Tirk şermezar kirin. Di mîtîngê de danezan bi Elmanî hatin xwendin û bêyî navber dirûşmên “Bijî gerîla“ û “Jin jiyan azadî“ hatin berzkirin.

 

Mannheîm 

 

Li bajarê Mannheîm ê Elmanyayê, gelek kurd, di mîtînga li dijî êrişa bi çekên kîmyewî de hatin ba hev. Mîtîng, li navenda Mannheîmê hat lidarxistin. Di mîtîngê de danezan bi elmanî û kurdî hatin xwendin. Siyasetmedarê kurd Faysal Sarilyildiz ku di mîtîngê de axivî, diyar kir ku dewleta Tirk a li dijî berxwedana gerîla neçar maye, di kirina hovîtîyê de sînornenas e û got ku hovîtî û pêkanînên dijmirovî di ruhê Komara Tirkiyeyê de hene.

 

Çalakgeran destnîşan kir ku derketina xwedî li gerîla bi geşkirina têkoşînê, erka hemû welatparêzan, Gelê Kurd û dostên wan e. Çalakî, bi berzkirina dirûşman bi dawî bû.