STENBOL - Îsal jî di pêşbirka Xelatên Şehîdên Çapemeniya Azad  û Musa Anter de, kesên nûçeyên wan hêjayî xelatê hatin dîtin diyar bûn. Di pêşbirka hat kirin de ajansa me di dû beşan de hat xelatkirin.

 

Di 20’ê îlona sala 1992’yan de rojnameger, nivîskar û zanyarê kurd Mûsa Anter li Amedê ji hêla JÎTEM’ê ve hat qetilkirin. Piştî qetilkirina Mûsa Anter, Xelatên Rojnamegeriyê yên Mûsa Anter û Şehîdên Çapemeniya Azad hatin dayîn. Xwediyên 29’emîn Xelatên Rojnamegeriyê yên Apê Mûsa Anter û Şehîdên Çapemeniyê diyar bûn. Pêşbirk îsal ji hêla Rojnameya Yenî Yaşamê ve hat organîzekirin û di beşên “Nûçeyên Kurdî”, “Nûçeyên Tirkî”, “Wêne (wêneyê nûçeyan)”, “Karîkatûr” û ji bo bîranîna Gurbetellî Ersoz jî “Rojnamegeriya Jin” de xelat hatin dayîn. 

 

Beşa nûçeyên tirkî

 

Ajansa Mezopotamyayê di beşên “Nûçeya Tirkî” û “Wêne” de hêjayî xelatê hate dîtin. Xelat dê di 23’yê îlonê saet di 18.00’an de li Navenda Çandê ya Cemîl Kent a Şaredariya Şîşlî ya Stenbolê bi torenekê bên dayîn. 

 

Juriyên “Beşa Nûçeyên Tirkî” rojnameger Candan Yildiz, Faruk Eren, Fatîh Polat, Tugrul Eryilmaz, Îbrahîm Varli û Huseyîn Aykol bûn. Di vê beşê de ji bianet’ê nûçeya Evrîm Kepenek a bi ser navê “Îdiaya ku li Beylîkduzuyê zarokeke 2 salî hatiye îstîsmarkirin” hêjayî xelatê hat dîtin. 

 

Her wiha 3 nûçe jî hêjayî “Xelata Taybet a Juriyê” hatin dîtin. Ji Evrenselê nûçeya Mûrat Uysal a bi ser navê “Li Yenîsahrayê çi bû? Ji bo şewatê her tişt amade bû, şixate bi zarokan dan hilkirin”, ji Ajansa Nûçeyan a Etkînê nûçeya Yildiz Tar a bi ser navê “Kujerê ku Mîra kuştî, wesayîta wî dizî û bi hevalên xwe re çû dawetê” û ji Ajansa Mezopotamyayê jî nûçeya Semra Turan û Tolga Guney a bi ser navê “Li Girtîgeha Aydinê mirina biguman: Întîhar e yan cînayet?” hêjayî Xelata Taybet a Juriyê hatin dîtin. 

 

Beşa wêneyan

 

Di “Beşa Wêneyan” de jûrî Ramazan Ozturk, Ozcan Yaman, Nezahat Dogan, Refîk Tekîn û Çetîn Altun bûn. Di Beşa Wêneyan de wêneyê cenazeyê Hakan Arslan ku di 2’yê kanûna sala 2015’an di dema qedexeyên derketina derve ya li Sûr a Amedê jiyana xwe ji dest dabû û 7 sal piştre di telîsekî de radestî bavê wî Alî Riza Arslan kirin hêjayî xelatê hat dîtin. Ji Ajansa Mezopotamyayê wêneyê Eylem Akdag ê bi ser navê “Giraniya Tûrekî” hêjayî xelatê hat dîtin. Ji Evrenselê wêneyê bi navê “Mala Min Çû” jî hêjayî Xelata Taybet a Juriyê hat dîtin. 

 

Beşa nûçeyên kurdî

 

Di “Beşa Nûçeyên Kurdî” de jurî rojnameger Leyla Ayaz, Kadrî Esen, Suna Tunç, Bêrîtan Zagros û Ramazan Olçen bûn. Ji xwebatkarê Perxudres Podcastê nûçeya Omer Faruk Baran a bi ser navê “Manaya bilibendê û çend sirên ‘Kurdish Mashup 2019’” hêjayî xelatê hat dîtin. 

 

Ji JINNEWS’ê nûçeya Medya Uran a bi ser navê “Girêdayî êrişa nîjadperest a li Qazakistanê agahiyên nû!” hêjayî Xelata Taybet a Juriyê hat dîtin. 

 

Xelbatên rojnamegeriya jin

 

Di “Beşa Rojnamegeriya Jin a Gurbetellî Ersoz” de jurî rojnameger Ceren Sozerî, Bîrcan Degîrmencî, Elîf Akgul, Pinar Ural û Habîbe Eren bûn. Di vê beşê de ji JINNEWS’ê nûçeya Midûra Karên Nivîsan a JINNEWS’ê Safiye Alagaş a bi ser navê “Polîs tecawiz kir, dozger, bijîşk û polîs xwest veşêre” hêjayî xelatê hat dîtin. 

 

Alagaş, di çarçoveya operasyona li Amedê li dijî rojnamegeran hatibû kirin de tevî 15 hempîşeyên xwe hatibû girtin. Alagaş, niha li Girtîgeha Jinan a Amedê tê ragirtin. 

 

Beşa karîkaturê

 

Di “Beşa Karîkatûrê” de jurî îmam Cîcî, Sefer Selvî û Asli Alpar bûn. Xelata yekemîniyê ya ê beşê di navbera du berheman de hat parvekirin. Xelat, di navbera karîkatûrê Ozgur Evran a bi navê “Atlasli” û yê Mûrat Îpek ê bi navê “Cesedê gul vekirî (gül açmış ceset)” de hate parvekirin. Karîkatûrê biçentîk ê Halîl Îbrahîm Çoban ku bi cesedan li dîwarê girtîgehê ve hatibû daliqandin jî hêjayî Xelata Taybet a Juriyê hat dîtin. 

 

Ji dayikan re xelata rûmetê

 

Di Xelatên Rojnamegeriyê ya Mûsa Anter û Şehîdên Çapemeniyê Azad de her wiha Xelata Rûmetê jî hat dayîn. Dayikên ku bi mebesta berdana girtiyên nexweş û girtiyên înfaza wan hatiye şewitandin dest bi Nobeta Edaletê kirin, hêjayî Xelata Rûmetê hatin dîtin.