WAN/ BEDLÎS - Bi pêşengiya Meclîsa Jinê ya HDP'ê û TJA'yê li Wanê jinan hevdîtin pêk anîn û li Tewanê jî bi sedan jin beşdarî hevdîtinê bûn û gotin:"Dem dema azadiya Rêberê PKK'ê Abdullah Ocalan e."

 

Tevgera Jinên Azad (TJA) û Meclîsa Jinê ya Partiya Demokratîk a Gelan (HDP) di çarçoveya 8'ê Adarê Roja Jinên Cîhanê li Wan û Bedlîsê çalakî li dar xistin. 

 

Wan

 

Li Kuçeya Hacibekir a girêdayî Rêya Armûşê ya Wanê hevdîtina jinan pêk hat. Parlamentera HDP'ê ya Wanê Muazzez Orhan, Hevseroka HDP'ê ya Wanê Handan Karakoyun, Hevseroka Partiya Herêmên Demokratîk (DBP) a Wanê Gulderen Varli û gelek jin beşdarî hevdîtinê bûn. Jinan lolîpopên bi nivîsên "Ji bo jiyaneke hevpar em ê li dijî nîjadperestiyê bisekinin","Zimanê me hebûna me ye" danîn ser daran. Her wiha jinan dowîzên bi nivîsên "Bijî berxwedana zindanan","Ew ê jin van rojên tarî ronî bikin","Zimanê min nasnameya min e nasnameya min rûmeta min e" li baxçe danîn. 

 

Di çalakiyê de Muazzez Orhan bal kişand ser tundiya li ser jinê û got ev ji ber polîtîkayên bêcezahiştinê ye. 

 

Jinan li lîstika Şanoya Mencel temaşe kirin û çalakî bi dawî bû. 

 

Tetwan

 

Tevgera Jinên Azad (TJA) û Meclîsa Jinê ya Partiya Demokratîk a Gelan (HDP) di çarçoveya 8'ê Adarê Roja Jinên Cîhanê li Tetwana Bedlîsê çalakî li dar xistin. Parlamentera HDP'ê Feleknas Uca, Hevşaredara Erdişê ya berê Dîba Keskin, aktivistên TJA'yê, Dayikên Aştiyê û gelek jin beşdarî çalakiyê bûn. Pankartên "Li hember şer tundî û xizaniyê dem dema azadiya jinê ye" li eywana çalakiyê hatin daliqandin. Her wiha jinan dirûşmên "Biji Serok Apo" û "Jin jiyan azadî" berz kirin. 

 

Çalakiyê bi rêzgirtina ji bo têkoşerên azadiyê dest pê kir. Diba Keskin di destpêkê de axivî û got li her derê dinyayê jin li ber xwe didin. 

 

Feleknas Uca jî bal kişand ser azadiya Rêberê PKK'ê Abdullah Ocalan û got dem dema azadiy Birêz Ocalan e.