COLEMÊRG - Ji hêla TJA û Meclîsa Jinan a HDP'ê ya Colemêrgê ve li Geverê şahiyek hat lidarxistin. 

 

Tevgera Jinên Azad (TJA) û Meclîsa Jinan a Partiya Demokratîk a Gelan (HDP) a Colemêrgê, bi minasebeta 8'ê Adarê li Geverê şahiya 8'ê Adarê li dar xist. Hevserokên HDP'ê yên bajêr û navçeyan, endamên Meclîsa Dayikên Aştiyê û gelek jin tevlî şahiyê bûn.

 

Jinan bi cilên xwe yên kurdewarî tevlî şahiyê bûn û dirûşmên "Jin jiyan azadî" û " Em xwe diparezin" berz kirin. Her wiha li salonê pankarta “Dem dema azadiya jinê ye", “Semra Guzel vîna gel e", “Tecrîdê bi dawî bike û rê bide aştiyê" û “Ji bo girtiyên jin edalet” pankart hatin daliqandin. 

 

Piştî rêzgirtinê bername hat destpêkirin û li ser navê Meclîsa Dayikên Aştiyê ya Geverê Gulçîn Karabuk axivî. 

 

Di şahiyê de hevseroka HDP'ê ya Colemêrgê Humeyra Armut, axivî û bal kişand ser polîtîkayên şer ên taybet a ku li hemberî jinan tê meşandin. Humeyra, destnîşan kir ku jin divê li dijî polîtîkayên şer têbikoşin û got: "Em di vê baweriyê de ne ku dê sedsala 21'an dê bibe sedsala azadiya jinê." 

 

Şahiya jinan bi gerandina govendê bi dawî bû.