NAVENDA NÛÇEYAN - Li gundê Digura Şengalê bi semîner û sînevîzyonek Zeynep Kinaci hat bibîranîn. Li Şehbayê jî Rêxistina Kongreya Star a Herêma Efrînê bi civînekê Zeyneb Kinaci bi bîr anî.

 

Ji bo bîranîna Zeynep Kinaci bi nasnav Zîlan li gundê Digura Şengalê bi pêşengiya Tevgera Azadiya Jinên Êzidî (TAJÊ) semînerek hat lidarxistin. Her wiha Zeynep di salvegera şehadeta xwe de li seranserî Bakur û Rojhilatê Sûriyeyê tê bibîranîn. 

 

Li Şengalê sînevîzyon hat nîşandan

 

Li gundê Digura Şengalê semînerek hat lidarxistin û sînevîzyonek hat nîşandan. Endamên TAJÊ Dayê Xoxê Cindî, Edol Şemo û Hevseroka Meclisa Xweseriya Demokratîk a Şengalê Riham Hico di derbarê xebat û jiyana Zîlan de axifîn. Hevseroka Meclisa Xweseriya Demokratîk a Şengalê Riham Hico diyar kir ku Zîlan beriya Tevgera Azadiya Gelê Kurd nas bike jî kesayetek jîr û zane bûye, ev rê bi zanatî hilbijartiye. Endama Koordînasyona TAJÊ Xoxê Cindî jî diyar kir ku bi saya pakrewanan, ew gihîştine vê astê dê her li pey şopa wan bin. 

 

Ji bo Zîlanê li Şehbayê bernameya bîranîne 

 

Rêxistina Kongreya Star a Herêma Efrînê bi civînekê Zîlan bi bîr anî. Civîn li Navenda Çand û Hunerê ya navçeya Ehdas a Şehbayê ya Bakur û Rojhilatê Sûriyeyê bi tevlibûna şêniyên Şehba, Efrîn, endam û nûnerên saziyên Rêveberiya Xweseriya Demokratîk pêk hat. Her wiha hola civînê bi wêneyên Rêberê Gelê Kurd Abdullah Ocalan û Zeyneb Kinaci (Zîlan) hatibû xemilandin. Têkildarî jiyan û têkoşîna Zîlanê sînevîzyonek hate pêşandan. 

 

Rêvebera Meclisa herêma Efrînê Newroz Ehmed pakrewanên azadiyê di kesayeta têkoşer Zîlan de bi bîr anî û ji bo çalakiya Zîlan ev tişt got: "Em di kesayeta Zîlan de hemû cangoriyên azadiyê bi bîr tînin û em bi saya tekoşîna wan îro xeta berxwedanê didiomînin."

 

Herî dawî koma şehîd Avesta ya Tevgera Çand û Hunerê ya herêma Efrînê, têkildarî berxwedan û têkoşîna Zîlanê stran gotin.