STENBOL - Malbat, wasî û parêzerên Rêberê PKK’ê Abdullah Ocalan, ji bo biçin hevdîtinê serî li Serdozgeriya Komarê ya Bûrsayê dan. 

 

Parêzerên Rêberê PKK’ê Abdullah Ocalan ê li Girtîgeha Îmraliyê ya Ewlehiya Bilind a Tîpa F dimîne, Mazlûm Dînç, Îbrahîm Bîlmez, Newroz Ûysal û Serbay Koklu ji bo ku bi muwekîlên xwe re roja duşemê hevdîtinê bikin, serî li Serdozgeriya Komarê ya Bûrsayê dan.

 

Serlêdana ji bo cejnê

 

Birayê Abdullan Ocalan, Mehmet Ocalan û wasiyê wî Mazlûm Dînç, birayê Omer Hayrî Konar, Alî Konar, birayê Hamîlî Yildirim Polat Yildirim û xwişka Veysî Aktaş, Melîha Çetîn bi riya parêzerên xwe ji bo 13-14-15’ê Gulanê hevdîtinê bikin serlêdan kirin.  

 

Bersiva serlêdanan nayê dayin

 

Di 23’yê Îlonê de bi hinceta “Nexşerêya" ku di sala 2019’an de weke pêveka parastina xwe ji Dadgeha Mafê Mirovan a Ewropayê (DMME) re şandiye, ji bo 6 mehan biryara qedexeya parêzeran dabûn Ocalan û 3 girtiyên gel wî. Li gel ku qedexeya hevdîtinê di 23’yê Adarê de qediya jî, ji serlêdanên parêzeran re ne erênî ne neyînî bersiv nayê dayîn.

 

Ji parêzerên Abdullah Ocalan, Rezan Sarica û Newroz Ûysal, piştî 8 salan di 2-22’yê Gulan, 12-18’ê Hezîran û 7’ Tebaxa 2019’an de hevdîtin bi muwekîlên xwe re kiribûn.

 

Hevdîtina di nêvî de hat qutkirin

 

Herî dawî ji ber îdiayên li ser hesabên medyaya civakî yên derbarê Ocalan de fikarên raya giştî mezin bûbûn û di 25’ê Adarê de birayê Abdullah Ocalan, Mehmet Ocalan pê re bi telefonê axivî bû. Lê Mehmet Ocalan ragihandibû ku hevdîtina telefonê di nivî de hatiye birîn.

 

Abdullah Ocalan ku 22 sal in li Girtîgeha Îmraliyê ya Ewlehiya Bilind a Tîpa F di bin tecrîdeke girankirî de girtî ye cara ewil di 27’ê Nîsana 2020’an de bi telefonê bi birayê xwe Mehmet Ocalan re axivî bû.