STENBOL - Dayika Aştiyê Sîmanperî Akyildiz ji ber şewba koronayê jiyana xwe ji dest da. Sîmanperî di dema grevên birçîbûnê yên 2018'an de li ber girtîgehan, ligel Dayikên Laçikspî tevlî çalakiya bûbû ji hêla polîsan ve li erdê hatibû kaşkirin.

 

Dayika Aştiyê Sîmanperî Akyildiz a li nexweşxaneyek Stenbolê dihat dermankirin jiyana xwe ji dest da. Sîmanperî bi eslê xwe ji navçeya Tûxê ya bajarê Bedlîsê bû û her wiha nexweşiyên wê yên dil û astimê hebûn. Sîmanperî ji ber şewba koronayê 15 rojan li nexweşxaneyê  hat dermankirin.

 

Sîmanperî ya bi têkoşîna xwe tê nas kirin û di gelek çalakiyên ji bo aştî, wekhevî û azadiyê dihat lidarxistin de cih digirt. Her wiha di dema grevên birçîbûnê yên par de li ber girtîgehan, wek Dayikên Laçikspî tevlî çalakiya bûbû ji hêla polîsan ve li erdê hatibû kaşkirin. Di têkoşîna xwe de gelek caran bi êrîşa polîsan re rû bi rû dima.

 

Sîmanperî dayika girtiya sîyasî Leyla Akyildiz a li Girtigeha Jinan a Bakirkoyê girtî ye.