QAMIŞLO - Heyva Sor a Kurd ya bajarê Dêrikê li ser Vîrusa Corona  û parastina bedenê ya ji vîrusê, semîner da.

 

Bi pêşengtiya Heyva Sor a Kurd li bajarê Dêrikê yê Kantona Qamişloyê li ser Vîrusa Corona û parastina  bedena mirov ji vîrusê, her wiha ji bo hişyariya malbatan a ji bo xeteriya virusê, semîner hat dayin. Semîner li Ocaxa Tendirustiyê ya bajarê Dêrikê  bi beşdarbûna bi dehan ji şêniyên  bajêr, hate dayin. Semîner ji aliyê Endamên Heyva Sor a Kurd Helez Remedan û Soniya Seîd ve, hate dayin.

 

Helez Remedan li ser belavbûna Vîrusa Corona û nîşaneyên wê wiha got: ”Vîrusa Corona ev demeke li tevahî welatên cîhanê belav bûye û gelek kes bi vîrusê,  jiyana xwe ji dest dane.  Heya niha vîrus negihaye herêmên me, lê ji bo ku em xwe ji vîrusê biparêzin û nehêlin belav bibe,  pêwîst e ku em civaka xwe li dijî xeteriya mûhtemel hişyar bikin. Kesên temenmezin û yên ku nexweşiyên cuda weke şekir, pençeşêr û hwd. bi wan re hebe vîrus zû xwe li wan digire. Her wiha nîşanên nexweşiyê jî ew e ku êşa qirikê zêde dibe, mirov hilmê bi dijwarî digire û germahiya laş zêde dibe. ”

 

Her wiha Endama Heya Sor a Kurd Soniya Seîd jî li ser xweparastina ji vîrusê wiha got: ”Pêwîst e dema ku mirov bipişke an jî bikuxin, tedbîrên xwe bigirin. Her wiha ji her 20 deqeyî carekê pêwîst e ku mirov destên xwe baş bişon û xwarina ku tê çêkirin pêwîst e baş were şuştin û kelandin.”

 

Semîner bi pirs û bersivan bi dawî bû.