NAVENDA NÛÇEYAN - Berxwedana Kobanê, bi pêşengiya YPJ û YPG'ê li dijî dorpêça DAIŞ'ê, bi çalakiyên ku di 1'ê Mijdara 2014'an de li welatên cuda yên cîhanê hatin lidarxistin, bû rojeva hevpar a hevgirtina navneteweyî.

 

Berxwedana ku di sala 2014'an de li dijî êrîşên DAIŞ'ê yên li ser Kobanî çêbû, ji nobedên hevgirtinê li ser sînor bigire heta meşên li bajarên cîhanê berfireh bû. Rola Yekîneyên Parastina Jinan (YPJ) di parastina bajêr de û berxwedana jinan di nav mijarên berbiçav ên vê serdemê de bûn. Her ku dorpêç berdewam dikir, bangek navneteweyî ya çalakiyê 1'ê Mijdarê kir rojek hevpar a hevgirtinê bi Kobanê re. Rizgarkirina bajêr ji DAIŞ'ê di 26'ê Çileya 2015'an de hate ragihandin.

 

DAIŞ'ê êrîşeke berfireh li ser Kobanê da destpêkirin. Berxwedana bi pêşengiya YPJ û Yekîneyên Parastina Gel (YPG) li dijî DAIŞ'ê pêş ket dema ku ew ber bi gundên derdora bajêr ve diçûn. Êrîşan bûn sedema koçberbûna gundiyan û dorpêça li ser bajêr dijwartir kir.

 

Şervana YPJ’ê Arîn Mîrkan 5’ê Cotmehê di operasyona li dijî çeteyên DAIŞ’ê de li Girê Miştenûrê ku nuqteyeke stratejîk a Kobanê ye çalakiya fedaî pêk anî. Arîn Mîrkan bû yek ji sembola berxwedana jinên ku beşdarî parastina Kobanê bûne.

 

Piştî bangeke navneteweyî, di 1'ê Mijdarê de li gelek welatan meş û mîtîngên piştgiriyê ji bo Kobanê hatin lidarxistin. Çalakiyên ji Londonê heta Berlînê hatin lidarxistin, banga piştgiriyê ji bo xelkê bajarê dorpêçkirî û hêzên berxwedanê kirin. Bi vî awayî, ev roja çalakiya hevbeş, ku di dema dorpêçkirinê de pêk hat, destpêka Roja Cîhanê ya Kobanî bû.

 

Hêzên bi pêşengiya YPJ û YPG'ê di 26'ê Çileyê de ragihandin ku navenda bajarê Kobanê ji destê DAIŞ'ê hatiye rizgarkirin. Têkoşîna ku di meha Îlonê de dest pê kir û wekî berxwedaneke 134 rojan di dîrokê de cih girt, li navenda bajêr bi serkeftinê bi dawî bû. Lêbelê, li gundên derdorê pevçûnên li dijî DAIŞ'ê berdewam kirin.