NAVENDA NÛÇEYAN - Festîvala Jinan a Zîlan îsal cara 19’emîn li bajarê Leverkusen ê Almanyayê bi dirûşmeya “Bi Jin Jiyan Azadî Destketiyên Jinê Biparêz e” hate lidarxistin. Festîval diyariyê jinên ku di têkoşîna azadiyê de jiyana xwe ji dest dane, hate kirin.

 

Di festîvala bi pêşengiya jinan hate lidarxistin de peyamên siyasî, performansên çandî û piştevaniya civakî bi awayekî herî xurt derket pêş. Axaftina vekirinê ya festîvalê ji aliyê nûnera Civata Komelên Jinên Kurdistanê (KJK) Meryem Rojhilat ve hate kirin. Meryem Rojhilat destnîşan kir ku pevçûna ku di navbera Îran û Îsraîlê de mezin dibe, ji bo civaka Rojhilat xeteriyekî cidî çêdike.

 

Meryem Rojhilat diyar kir ku tevgera Kurd wê nebe alîyek vî şerî û wiha got: “Gelê Kurd ji derveyî vê pevçûnên hegemonîk in û bi şoreşa ‘Jin, Jiyan, Azadî’ re rêveberên rêya sêyemîn in.” Meryem Rojhilat bi lêv kir ku girtiyên siyasî di bin zexta zêde dibe de ne û destnîşan kir ku di vê pêvajoyê de parastina gel û mafan berpirsyariyekî dîrokî ye. Her wiha hate diyarkirin ku paradîgmaya rêya sêyemîn a Rêberê Gelê Kurd Abdullah Ocalanji bo hemû gelên Rojhilata Navîn bi taybet ji bo tevgera jinên Kurd modelekî çareseriyê ya jiyanî pêşkêş dike.

 

Di festîvalê de li ser navê Însîyatîfa Têkoşîna Azadiyê ya Neteweyî ya Belûc Safîa Mansûr axivî û peyama piştgriyê ya ji aliyê Jinên Elewî yên Sûriyeyê hatibû şandin, bi beşdaran re hate parvekirin.

 

Hunermend Berfin Mamedova, Sosin, Nûarîn, Binevş Cizîrî, Zinê Botanî, Ozgur Işik, koma govendê ya TEV ÇAND’ê û dengbejên ku di festîvalê de derketin ser dîkê, ji aliyê temaşevanan ve hatin ecibandin. Cil û bergên neteweyî yên bi reng, govend û coşa jinan salona festîvalê veguherand qadekî azadiyê.

 

19’emîn Festîvala Jinan a Zîlan ku huner, siyaset û têkoşîna civakî anî gel hev, bi atmosfera xwe ya xurt a bi “Jin, Jiyan, Azadî” bi dawî bû.

 

Çalakî bi stranên sembola berxwedan û piştevaniya jinan bi dawî bû.