NAVENDA NÛÇEYAN- Meclîsa Dayikên Aştiyê ya Amed û Wanê, ku derbarê mirina Sirri Sureyya Onder de daxuyaniyek da, peyama "Aştî û demokrasî wê werin vî welatî. Hûn ê bi çavên vekirî dernekevin" dan.

 

Meclîsa Dayikên Aştiyê yên Amed û Wanê ji ber koça dawî ya Parlamenterê Partiya Wekhevî û Demokrasiyê ya Gelan a Stenbolê yê (DEM Partî) û endamê Heyeta Îmraliyê Sirrî Sureyya Onder daxuyaniyek weşand.

 

Amed

 

Dayikên Aştiyê li avahiya xwe ya li navçeya Rezan a Amedê daxuyaniyek dan. Berdevka Meclîsa Dayikên Aştiyê ya Amed Havva Kiran di daxuyaniyê de got, "Parlamenterê me ji bo aştiyê şer dikir. Wî ji bo aştiyê, ji bo bidawîbûna şer gav diavêt. Li ser navê me dayikan, em sersaxiyê ji malbata wî re dixwazin û êşa wan parve dikin. Bi îzna Xwedê, aştî û demokrasî dê were vî welatî. Ew ê bi çavên vekirî neçe."

 

Wan 

 

Endamên Meclîsa Dayikên Aştiyê yên Wanê li baxçeyê avahiya Partiya Wekhevî û Demokrasiyê ya Gelan (DEM Partiyê) daxuyaniyek çapemeniyê dan.

 

'Ji bo hemû gelê Kurd xemgîniyeke mezin e'

 

Perîşan Aslan, ku di daxuyaniyê de ewilî axivî, xemgîniya xwe ya ji ber koça dawî ya Sirri Sureyya Onder anî ziman û got, "Nûnerê me jiyana xwe ji dest da, em hemû pir xemgîn in. Ev ji bo me û ji bo hemû gelê Kurd xemgîniyeke mezin e. Sersaxiyê ji Birêz Abdullah Ocalan û Kurdistanê re dixwazim. Nûnerê me hewl dida aştiyê pêk bîne lê nikarîbû tiştê ku dixwest bike, biqedîne."

 

'Ew qasidê aştiyê bû'

 

Piştre Hanîfe Koçak axivî û got, "Sersaxî ji bo hemû hevalên wî û Birêz Abdullah Ocalan em dixwazin. Ew bi salan e ji bo aştiyê dixebite. Bila daxwaza wî di dilê wî de nemîne, bila aştî were avakirin. Wî got ku heta aştî neyê ew ê neçe tu derê. Daxwaza me ji hemû gelê me ev e ku divê her kes ji bo daxwaza qasidê aştiyê hewl bide. Ew qasidê aştiyê bû û hewl dida ku hêsirên dayikan êdî neherikin. Wekî Dayikên Aştiyê, ji bo misogerkirina aştiyê çi ji destê me tê em ê bikin."

 

'Ji bo her kesî rojek tarî ye'

 

Di dawiyê de, Eynê Atabay got ku îro ji bo hemû gelan rojek tarî ye û got, "Sersaxiyê ji hemû gelê Kurd re dixwazim. Em hêvî dikin ku daxwaza wan a aştiyê pêk were. Daxwaza wan a aştiyê her tim aştî bûye. Îro ji bo her kesî, çi Kurd çi Tirk, rojek tarî ye. Em jî ji bo aştiyê hewl didin. Tevî gorên zarokên me tune ne jî, em dîsa jî aştiyê dixwazin. Divê her kes destê xwe dirêjî aştiyê bike. Me êş kişandiye, divê kesekî dinê êşê nekişîne."

 

Riha 

 

Meclîsa Dayikên Aştiyê ya Rihayê ji bo bîranîna Serokwekîlê Partiya Wekhevî û Demokrasiyê ya Gelan (DEM Partî) û endamê Şandeya Îmraliyê Sirri Sureyya Onder ê koça dawî kir, daxuyaniyek çapemeniyê li dar xist. Daxuyaniya ku li ber Avahiya Bajarê Rihayê ya DEM Partiyê hate dayîn, Dayikên Aştiyê û gelek welatî amade bûn.

 

Dayika aştiyê Meyaser Korkmaz di daxuyaniyê de got, "Gelê Kurdistanê mirovekî pir hêja winda kir. Wî di tevahiya jiyana xwe de aştî dixwest. Wî ala aştiyê heta roja îro anî. Em ala wî hildigirin."

 

Dayika aştiyê Aynur Yilmaz jî diyar kir ku ew ê ala wî ya aştiyê bigirin û got: " Wî her têkoşîn da, da ku dayik negirîn. Em wekî dayikên Kurd soz didin ku di vê têkoşînê de ala wî bilind bikin."

 

Daxuyanî bi dirûşmeyên wekî "Şehîd Namir" û çepikan bi dawî bû.