NAVENDA NÛÇEYAN - Şandeya brîtanî ku serdana xwe ya li Bakur û Rojhilatê Sûriyeyê diomîne, bi rêxistin û tevgerên jinan re hevdîtin kir. Brîtanî bi rêxistin û tevgerên jinan re civiya.

 

Şandeya ji Brîtanyayê hevdîtinên xwe li Bakur û Rojhilatê Sûriyeyê didomîne. Şande ji şaredarê bajarokê Madison Martin Round, şêwirmend û cîgira serokê Koma Kedê ya Meclisa Kantona Kent Karen Constantine, serokê berê yê Kongreya Sendîkayên Karkeran Roger Lyons û rêveberê Kampanyaya Mid a Balafirgehan Jason Kaplan pêk tê.

 

Şandeyê serdana Navenda Têkiliyên Dîplomatîk a Kongra Star a li bajarê Qamişloyê kir.

 

Şande ji aliyê endamên Kongra Star, Yekitiya Jinên Suryan û nûnerên jin ên yekitiyên civaka sivîl û partiyên siyasî ve hat pêşwazîkirin.

 

Di hevdîtinê de girîngiya beşdarkirina jinan di nivîsandina destûra nû ya welat de, astengiyên li pêşiya jinan, rewşa jinên koçber ên ji Efrîn, Girê Spî û Serêkaniyê û êrişên dewleta Tirk a dagirker û çeteyên wê yên li ser herêmê hatin nîqaşkirin.

 

Endamên şandeya brîtanî kêfxweşiya xwe bi serdanê anî ziman û diyar kir ku dê dengê jinên Bakur û Rojhilatê Sûriyeyê ragihîne gelê Brîtanyayê.

 

Endama Koordînasyona Meclisa Jinan a Bakur û Rojhilatê Sûriyeyê Stêra Qasim jî bal kişand ser siyaseta dûrxistin û paşguhkirinê ya desthilata Şamê ku li dijî jinan dimeşîne û diyar kir ku ew nêzîkatiyên desthilata Şamê qebûl nakin.

 

Endama Komîteya Têkiliyan û Lihevkirinên Siyaseta Demokratîk a Kongra Star Emîne Oso îşaret bi rola jinan di hemû qadên jiyanê de kir û bi bîr xist ku proseyên siyasî yên ku jin û tevahî pêkhateyên Sûriyeyê tê de cih negirin, kêm in.

 

Endama Koordînasyona Meclisa Jinan Sebah Şabo jî diyar kir ku Rêveberiya Xweser mafên jinên Suryan daye wan û beşdarî navendên biryardayînê kirin. Her wiha da zanîn ku desthilata Şamê, Suryan jî di nav de, tevahî pêkhateyan paşguh dike û got: "Kongreya Diyaloga Nîştimanî nûnertiya pêkhateyên Sûriyeyê nake."