ÊLIH - Di daxuyaniya ku ji bo 8'ê Adarê bi pêşengiya TJA'yê li Êlihê hat lidarxistin de hat ragihandin ku jin wê bi felsefeya "Jin jiyan azadî" berxwedana xwe bidomînin.

 

8'ê Adarê Roja Jinên Kedkar ên Cîhanê bi pêşengiya Tevgera Jinên Azad (TJA) li Êlihê bi dirûşmeya "Jin bi têkoşîna azadiyê re aştiyê bi rêxistin dikin" bi daxuyaniyekê dest pê kir. Gelek kes tevlî daxuyaniya li ber Petrol - Şaxa Îş Êlihê bûn.

 

Di daxuyaniyê de pankartên "Jin jiyan azadî", "Raperîna me li dijî qirkirina jinê ye, meşa me ber bi azadiyê ve ye/ Em li dijî kuştina jinan serî hildin, em ber bi azadiyê ve dimeşin" hatin vekirin. Di daxuyaniyê de pankartên "Azadî nayê tecrîdkirin", "Azadî bi xwerêveberiyê dest pê dike" û "Jin baxçeyê veşartî yê azadiyê ye" hatin vekirin.

 

Hevseroka Rêxistina bajarê Elihê ya DEM Partiyê Songul Korkmaz diyar kir ku jinan li dijî êrîşên li dijî destkeftiyên wan li ber xwe dane û got ku ev berxwedan wê bi ser bikeve.

 

Endama Meclîsa Şaredariya Êlihê Elîf Kivircik bal bir ser paradîgmaya azadiya jinê. 

 

Jinên cîhanê li ber xwe didin

 

Parlamentera DEM Partiyê ya Êlihê Zeynep Oduncu jî diyar kir ku jinên bi komkujiyan rû bi rû dimînin, berxwedana xwe didomînin û got, "Dema ku em li dîrokê dinêrin, girîngiya felsefeya 'Jin jiyan azadî' tê dîtin. Em dibînin ku ev felsefe felsefeya azadiya jinê ye. Jin wê li hemû cîhanê li ber xwe bidin."

 

Daxuyanî bi dîlan û govendê bi dawî bû.