MÊRDÎN - Hevşaredara Bajarê Mezin a Mêrdînê Devrîm Demîr di daxuyaniya ku piştî meşa li dijî qeyûm tayînî Mêrdînê hat kirin de axivî û diyar kir ku 418 kes ji kar hatine dûrxistin û got: "Îro me careke din dît ku çavê qeyûm di sifreya gel de ye."

 

Wezareta Karên Hundir di 4'ê Mijdarê de qeyûm tayînê li Şaredariya Bajarê Mezin a Mêrdînê û şaredariyên Êlih û Xelfetî ya Rihayê kir. Çalakî û bertekên li hemberî tayînkirina qeyûman didomin. 

 

Di roja 4'emîn a tayînkirina qeyûmê ya Şaredariya Bajarê Mezin a Mêrdînê de, Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) ji Şell Petrolê heta avahiya şaredariyê meşiyan. Di meşê de ku Hevserokê Giştî yê Partiya Herêmên Demokratîk (DBP) Keskîn Bayindir, Hevşaredarên Bajarê Mezin ê Mêrdînê Devrîm Demîr û Ahmet Turk û gelek kes amade bûn, dirûşmên "Be serok jiyan nabe", "Bijî berxwedana Mêrdînê", "Mêrdîn ya me ye şaredarî ya me ye" hatin berzkirin. Her wiha sirûda "Herne peş" hatin gotin. Girse li ber hat ber avahiya şaredariyê û li wir daxuyanî da.

 

'Em mafdar in'

 

Di daxuyaniyê de ewil Hevşaredara Bajarê Mezin a Mêrdînê Devrîm Demîr axivî û diyar kir ku 418 kesên di şaredariyê de dixebitin ji kar hatine dûrxistin. Devrîm Demîr, têkildarî armanca ji kar derxistina 418 kesan jî wiha got: “Îro me çavên xwe bi nûçeyek nû ya qeyûm vekir û 418 kes ji kar hatin derxistin. Îro careke din me dît ku çavê qeyûm li ser sifreya gel e. Tu wateyek din a qeyûm nîne. Careke din me dît ku mesele ne şaredarî ye. Mesele ew e ku kurd bila pariyek nan nexwin. Naxwazin kurd li ser axa xwe tiştekî bixwin. Di her du demên berê de jî dizî û talana wan bi rêya çapemeniyê ji raya giştî re parve kir. Careke din em van biryaran bi tundî şermezar dikin. Heta em maf, şaredarî û saziyên xwe bigirin em ê berxwedana xwe bidomînin. Di bin her şert û mercî de em ê li vir bin. Em dizanin ku em mafdar in. Em ê bi ser bikevin."

 

'Em serê xwe li ber we natewînin'

 

Piştre Hevserokê Giştî ya DBP'ê Keskîn Bayindir axivî û diyar kir ku beriya niha qeyûm tayînî şaredariyan hatibûn kirin, lê di mijara parastina vîna Gelê Kurd de gav paşve navêtine. Keskîn Bayindir wiha dewam kir: "Dixwazin em dev ji welatparêzî û zimanê xwe berdin, lê gelê Mêrdînê dê vîna xwe biparêze. Gelê Kurd her roj li dijî zilma we vîna xwe diparêze. Ya ku derdikeve holê tenê dijminatiya we ye. Armanca we tenê ev e, lê vê baş bizanibin, em ê tu carî serê xwe li ber we natewînin. Ji Asyaya Navîn, Kurdistanê heta Tirkiyeyê bi sedan kes piştgiriyê didin vê berxwedanê. Berxwedana me berxwedana li dijî bêhiqûqiyê ye. Yê ku ji dîrokê heta îro û paşerojê wê têk biçe, ne vîna me ye. Gelê me li hemû bajaran li dijî vê zilmê li ber xwe dide û vê rewşê qebûl nake. Ev meseleya hebûn û tunebûnê ye. Ji ber vê yekê em ê li hemberî vê yekê serê xwe bilind bikin û em ê bi ser kevin. Ev berxwedaneke bi nirx e. Ev berxwedan rêya azadiyê heye. Baweriya me bi vî gelê qehreman heye. Ev feraseta Erdogan û Bahçelî wê ji holê rabe.”

 

Herî dawî Keskîn Bayindir gotinên Serokomar Tayyîp Erdogan ên "Em destên xwe dirêjî Kurdan dikin" bi bîr xist û destnîşan kir ku destên dirêjkirî ne destên aştiyê ne û wiha bi lêv kir: “Dirêjkirina dest tê wateya destdirêjkirina vîna Gelê Kurd e. Heta ew polîtîka hebin wê Gelê Kurd jî li ber xwe bide."

 

Piştre Hevşaredarê Bajarê Mezin ê Mêrdînê Ahmet Turk axivî û bal kişand 418 kesên ku ji şaredariyê ji kar hatine derxistin û got: "Ez qeyûm pîroz dikim, we bi betalkirina 418 kesan welat rizgar kir."