NAVENDA NÛÇEYAN - Şerê Îran û Amerîka-Îsraîlê 36 rojin berdewam e, her diçe bîlançoya şer giran dibe. Li gorî HRANA ji destpêka şer ve nêzîkî 2 hezar welatî li Rojhilatê Kurdistan û Îranê jiyana xwe ji dest dane.

 

Rêxistina Mafê Mirovan a HRANA bi raporekê bîlançoya 24 saetên dawî ya şerê Îsraîl-Amerîkayê û Îranê ya Rojhilatê Kurdistan û Îranê belav kir.

 

HRANA ragihand ku di nava 24 saetên borî de li ser 13 parêzgehên Rojhilatê Kurdistan û Îranê, herî kêm 206 êriş hatin pêkanîn ku 31 baregehên leşkerî, baregehên Supayê Pasdaran, navendên hêza Besîc, balafirgehên leşkerî, navendên polîsan, bîrên neftê û qadên enerjiya atomî yên Îranê bûn.

 

Li gorî rapora HRANA di encama êrişên Amerîka û Îsraîlê yên 24 saetên borî de herî zêde bajarên wek Tehran, Xozistan, Elbûrz, Buşehr, Esfehan û Tewrêz hatine hedef girtin.

 

HRANA ragihand ku di êrişan de saziyên xizmetgûzariyê, cihên niştecihbûna welatiyan hatine hedef girtin, ji bilî wan şîrketên dermanan yên li parêzgeha Tehranê, havîngeha Înalî li parêzgeha Tebrizê, rawestgeha keştiyên geştiyarî li bendera Çarkê ya ser bi parêzgeha Hurmuzganê, kargeha alîkariyê li parêzgeha Şîrazê, zanîngeha Şehîd Beheştî li parêzgeha Tehranê, kêlgeha mirîşkan li bajarokê Behbehan ê ser bi parêzgeha Xozistanê û tunela rêya Qeretepe ya li devera Miyane ya ser bi parêzgeha Sine.

 

Her wiha hate ragihandin ku ji destpêka şerê Îran û Îsraîl-Amerîkayê heta duh ve li Rojhilatê Kurdistan û Îranê, hezar û 607 welatiyên sivîl jiyana xwe ji dest dane ku 244 jê zarokin.