Malbata Şenyaşar: Em ê vê bêhiqûqiyê li her deverê vebêjin

  • 11:32 12 Adar 2022
  • Rojane
RIHA - "Nobeda Edaletê" ya Emîne û Ferît Şenyaşar a li ber Edliyeya Rihayê di roja 369'an de berdewam dike. Emîne û Ferît wiha gotin:"Em ê vê bêhiqûqiyê li her deverê vebêjin."
 
Xizm û parastvanên parlamenterê AKP’ê Îbrahîm Halîl Yildiz di 14’ê hezîrana sala 2018’an de êrişî dikana malbata Şenyaşar a li Pirsûsê kir. Di êrişê de hevjînê dayika Emîne Şenyaşar û du kurên wê hatin qetilkirin. Kurê wê Ferît Şenyaşar jî ji komkujiyê bi birîndarî xelas bû. Ji bo girtin û darizandina kujeran û berdana Fadil Şenyaşar, dayika Emîne Şenyaşar û kurê xwe Ferît Şenyaşar di 9’ê adara 2021’ê de li ber Edliyeya Rihayê dest bi çalakiya Nobeta Edaletê kirin. Çalakiya malbatê di roja 369’an de berdewam kir.
 
Di rojên betlaneyê de deriyê edliyeyê girtî ye lewma jî malbata Şenyaşar çalakiya xwe li mala xwe ya li Pirsûsê berdewam kir. Malbatê, têkildarî mijarê li ser medyaya civakî ev peyam parve kir: “Serdestên ku welêt bi rê ve dibin; naxwazin ku civak zane bibe, biaxive û bikeve nava liv û tevgerê. Li nexweşxaneyê komkujiyek bi serê malbata me anîn. Kiryarên komkujiyê ji hêla desthilatdariyê ve tên parastin. Heta ku edalet pêk tê, em ê bêdeng nemînin. Em ê vê bêhiqûqiyê li her deverê vebêjin.”