TAJÊ: Em ê ji bo azadiya Ocalan têbikoşin

  • 15:11 21 Cotmeh 2021
  • Rojane
NAVENDA NÛÇEYAN - TAJÊ, derbarê tecrîda li hemberî Rêberê PKK'ê Abdullah Ocalan daxuyaniyek da û got: "Hebûn û îradeya me li Îmraliyê dibin tecrîdê ye. Ev jî tê wateya domandina metirsiya li ser Şengalê, lewma ew ê heta dawiyê ji bo azadiya fizîkî ya Rêber Ocalan têbikoşin."
 
Tevgera Azadiya Jinên Êzidî (TAJÊ) derbarê tecrîda girankirî ya li ser Rêberê PKK'ê Abdulah Ocalan de daxuyaniyek da çapemeniyê. Daxuyaniya ku li ber avahiya Meclîsa Gel a Şengalê hat dayîn, ji aliyê Endama Komîteya Dîplomasiyê ya TAJÊ’ê Suham Şengalî ve hat xwendin.
 
Di daxuyaniyê de wiha hat gotin: "Ev demek dirêje em agahî ji Rêber Abdullah Ocalan nagirin, dewleta Tirk a dagirker nahêle malbat û parêzer biçin serdanê û bersiva serlêdanan nayê dayîn. Hêzên desthiladar dixwazin bi girankirina tecrîdê re gel fêrî jiyanek bê Rêber Abdullah Ocalan bikin. Jiyaneke bêyî Rêbertiyê jiyanek bê vîn û azadî ye. Li seranserî Kurdistanê, bi taybet li başurê Kurdistanê dewleta Tirk a dagirker û hevalbendên wê yên wekî PDK’ê, dest bi êrîşek berfireh kirine. Lê bi berxwedana dîrokî ya gel û gerilla, berxwedana mezin a Rêber Apo re wê tevahiya êrîşan û tecrîd vala bên derxistin.
 
Civaka Êzidî, bi taybet jinên Êzidî tecrîda li ser Rêber Abdullah Ocalan, wekî tecrîdek li ser xwe dibînin. Hebûn û îradeya me li Îmraliyê dibin tecrîdê de ye. Ji bo vê jî wê hertim metirsî li ser Şengalê, bi taybet  li ser civak û jinên êzîdî berdewam bikin. Di nav 2 salên dawî de diyar bûye ku li ser Şengalê plangeriyek mezin tê meşandin. Bi pevpeymana 9’ê Cotmehê ya di navbera Kazimî û PDK’ê de pir zelal tê dîtin ku pergala desthilatdar û faşist vîna azad a gel qebûl nake.
 
Em wekî TAJÊ ew pergala Konfederalîzma Demokratîk a Rêber Abdullah Ocalan wekî çareseriya hemû pirsgirêkên civakî û siyasî dibînin. Lewma divê were pêkanîn. Ji bo vê jî divê azadiya fizîkî ya Rêber Apo bê mîsogerkirin. Wek jinên êzidî û civaka êzidî em çareserî û pêşeroja xwe di nav pergala Xweseriya Demokratîk de dibînin. Ji bo vê jî emê ji bo azadiya Rêber Apo ya fizîkî hertim têbikoşin. Em bang li mirovahiya azadîxwaz, Gelê Kurd, jin û ciwanan dikin ku ji bo bidawîkirina tecrîdê têbikoşin.”