ENQERE - Di Konferansa Jinan a Rêveberiyên Herêmî ya HDP’ê Hevseroka Giştî ya HDP'ê Pervîn Buldan axivî û got: "Me têra xwe zanebûn, ezmûn, motîvasyon û hêz heye. Em di siyaseta welat de di rewşek nûnertî û diyarker de ne. Ji ber vê heya em hebin, hêvî jî heye, cesaret jî heye, çareserî û aştî jî wê pêkan be."

 

Konferansa Jinan a Rêveberiya Herêmî ya ku ji hêla Lîjneya Rêveberiya Herêmî ya Partiya Demokratîk a Gelan (HDP) ve bi dirûşma "Dema hilweşandina rêjîma qeyûmê û avakirina rêveberiya demokratîk e" li Salona Konferansê ya Tesîsên Civakî û Mala Xwendekar Teoman Ozturk a Yekitiya Odeyên Avahîsaz û Endezyarên Tirk (TMMOB) hat lidarxistin didome. Piştî xwendina peyama Hevşaredara berê ya Bajarê Mezin Amedê Gultan Kişanak a li Girtîgeha Kandirayê dimîne, Hevseroka Giştî ya HDP’ê Pervîn Bûldan axivî. 

 

'Em ê xeyalên xwe yên hevpar ên jinan pêk bînin'

 

Pervîn, hemû jinên di konferansê de û yên têkoşîna azadiya jinan didin silav kirin û wiha got: “Ez hemû jinên hatine qetilkirin û Denîz Poyraz a di êrişa li dijî Rêxistina HDP’ê ya Îzmîrê de jiyana xwe ji dest da, bi bîr tînim. Em ê bi dilsoziya xwe ya bi bîranînên wan û bi soza xwe ya têkoşînê re, bi pêş ve biçin. Teqez em ê xeyalên xwe yên hevpar ên jinan pêk bînin. Îro em li vê derê ji bo jinan civîn û konferansek girîng li dar dixin. Em konferans xwe ya jinan a rêveberiyên herêmî ya demokratîk pêk tînin. Ji roja ku me dest bi têkoşîna jinan kir, me hedefek bi xweser danî pêşiya xwe. Gelo ev hedef çibû? Ev hedef zanebûna jinên azad, rêxistinbûyîna jinên azad bû. Bi kurtasî siyaseta jinên azad bû. Ji ber vê sedemê, me got nûnertiya wekhev û me ev yek bi avahiya xweya rêxistinbûyî dest pê kir.”

 

'Pergala hevserokatiyê destekftiyeke bi nirxe'

 

Pervîn, diyar kir ku kir tevlîbûna tevahiya jinan a di her warên jiyan û siyasetê de esas digirin û wiha pê de çû: “Di hemû mekanîzmayên biryargirtinê yên partiya me de, nûnertiya wekhev a jinê heye. Me ev yek xistiye pratîkê. Me armanc kir ku jin di astek wekhev de bibin berendam û di astek wekhev de bêne hilbijartin.  Bi vî rengî di siyasetê de bibin xwedî dengek wekhev û me ev bi hev re kir. Ji ber vê me got hevserokatî. Me bi pergala xwe ya hevserokatiyê re, nûnertiya wekhev di hemû qedemeyên rêveberiyên xwe de bi sazî kir. Ev model di warê nûnertiya wekhev a jinan li welatê me, Rojhilata Navîn û cîhanê de destkeftiyek bi nirxe. Ji bo hemû jinên cîhanê ku nasname û statuya jinan tê tepisandin, modelek girîng e. Em ê vê modelbûna xwe dewam bikin. Ev ji bo jinan serkeftineke sedsalê ye.”

 

'Qeyûm bi rihê darbeya 12'yê îlonê dixwaze serpiyan bimîne' 

 

Pervîn, bal kişand rejîma qeyûm û wih bilêv kir: “Em bi hişmendiyeke ku dixwaze jinan ji siyasetê, rêveberiyên herêmî, aborî û jiyana giştî dûr bixe re rû bi rû ne. Me her tim got, em ê cardin bêjin: Rejîma Qeyûm, hewldana darbeyê ya li dijî demokrasiyê ye. Darbeya li dijî vîna Gelê Kurd a xwe bi rêve dibeye. Hewldana darbeyê ya li dijî pergala hevserokatiyê ye. Dixwazin bi rejîma qeyûm rihê darbeya 12’ê Îlonê li ser piyan bigirin û dewam bikin."

 

'Em teslîm nabin û natirsin'

 

Pervîn, destnîşan kir ku li dijî pergala serdest, navendparêziya tekparêz ku hewl dide walêt bi qeyran, derew û zordariyê birêve bibe, modela xwe ya rêveberiyên herêmî yên demokratîk ava bikin û di têkoşîna xwe mezin bikin û wiha dirê jî da axaftina xwe: "Me tu carî dest jê têkoşînê berneda û em ê dest jê bernedin. Em dev jê bernadin û teslîm nebin. Em ne tirsiyan û emê tu carî netirsin. Bawer bikin, em ê teqez pergalek demokratîk a ku nûnertiya wekhev a jinan esas bigire ava bikin. Em gav bi gav nêzî vê yekê dibin û ber bi finale ve diçin."

 

'Hêvî û cesaret jî heye'

 

Pervîn wiha dawî li axaftina xwe anî: "Me têra xwe zanebûn, ezmûn, motîvasyon û hêz heye. Em di siyaseta welat de di rewşek nûnertî û diyarker de ne. Ji ber vê heya em hebin, hêvî jî heye, cesaret jî heye, çareserî û aştî jî wê pêkan be. Ez di vê rêyê de, ji hemû jinan û hemû hevalên xwe yên têkoşer re serkeftinê dixwazim. Em hemû bi hev re jin jiyan azadî! Serkeftin.”

 

Piştî ku Pervîn Buldan axaftina xwe bi dawî kir, konferans ji çapemeniyê re girtî berdewam kir.