NAVENDA NÛÇEYAN - Partî û saziyên kurd ên li Ewropayê êrişa li hemberî Şengalê şermezar kirin û gotin: "Em bang li civaka êzidî, Gelê Kurd, dostên demokratîk û mafên mirovan dikin ku li dijî êrişên dewleta Tirk seferber bibin, li ber xwe bidin.”

 

Platforma “Ji bo yekîtiya neteweyî ya Kurdistanê/Ewropa” ya ku ji saziyên Kurdistanî yên li Ewropayê pêk tê, li dijî êrişên li ser Şengalê daxuyaniyek da û banga lezgîn kir.

 

Di daxuyaniyê de hate ragihandin ku êrişa dewleta Tirk a li ser wesayitek li Şengalê û Nexweşxaneya gundê Sikêniyê ku di encamê de gelek kes jiyana xwe ji dest dan, sûcê şer ê navneteweyî û dijminatiya li civaka Êzidî ye.

 

Di daxuyaniyê de wiha hat gotin: "Dewleta Tirk hewl dide qirkirina civaka Êzidî ku DAÎŞ’ê nekarî bike, dewam bike. Civak êzidî gelek caran ji hêzên navneteweyî re gotiye ku Tirkiye ji bo Şengalê gefeke mezin e. Daxwaza naskirina xwerêveberî û xweparastinê kirin. NATO’yê û dewletên din rê dan Tirkiyeyê ku êrişî êzidiyan bike. Bêdengiya navneteweyî ya li pêşberî komkujiya li ser êzidiyan hîn jî dewam dike.

 

Civaka êzidî yek ji civakên herî kevn ê Mezotopamyayê ye. Piştî qirkirina 3'yê Tebaxa 2014’an, mafê êzidiyan e ku xwe biparêzin. Erk û berpirsyariya navneteweyî ye ku li ber qirkirineke nû bisekine. Dewleta Tirk bi van êrişan dixwaze qirkirina ku DAÎŞ’ê sala 2014’an kir dewam bike û Êzidiya bi rêk û pêk qir bike. Em careke din bang li mirovahiyê dikin ku li dijî êrişên Tirkiyeyê bisekinin û wan rawestînin. Em bang li civaka êzidî, Gelê Kurd, dostên demokratîk û mafên mirovan dikin ku li dijî êrişên dewleta Tirk seferber bibin, li ber xwe bidin.”

 

Saziyên ku daxuyanî dane: Yekîtî Niştimanî Kurdistan (YNK), Tevgera Goran, KCDK-E (Kongra Civaka Demokratîk a Kurdistanê-Ewropa), TJK-E (Tevgera Jinên Kurdistanê-Ewropa), Partiya ŞÛÎ – Başûrê Kurdistanê, Kongra Star (Rêxistina Jinan a Rojava, Bakur-Rojhilatê Sûriyeyê) Ewropa, Partiya Zahmetkêşan – Başûrê Kurdistanê, PADÊ (Partiya Azadî û Demokrasiya Êzîdiya), Tevgera Azadî, PYD (Partiya Yekîtiya Demokrat), P.D.K.S (Partiya Demokrat a Kurdî ya Sûriyeyê), Partiya Çep a Kurd li Sûriyeyê,Tevgera Nûjen ya Kurdistanî-Sûriye, PÇDKS ( Partiya Çep a Demokrat a Kurd li Sûriyeyê.), Partiya Demokrata Kurd li Sûriye( El Partî), Partiya Çep a Demokrat li Sûriye, Partiya Rêkeftin a Kurd li Sûriye, Partiya Çaksaziya Kurd li Sûriye, Partiya Kesk a Kurdistanî li Sûriye, Partiya Demokrata Kurdistanî li Sûriye, Partiya Komanist a Kurdistanî li Sûriye, PÎK (Partiya Îslamiya Kurdistan), KKP ( Partiya Kominista Kurdistan), Tevgera Kawa, PJAK(Partiya Jiyana Azada Kurdistan), Yakyatî Şoreşgêrî Kurdistan, KODAR (Civaka Demokratîk û Azada Rojhelatê Kurdistan), KJAR (Civaka Jinên Rojhelatî Kurdistan), Platforma Horam, Platform Zagros, Platform Yarsan, Yarî Kurd, Partiya Demokrat û Pêşverû Kurdî li Suriye, Tevçand (Tevgera Çand û Hunera Kurd), Kurdische Gemeinde Stuttgart e.V, FEDA ( Federasyona Elewiyên Kurdistanê), NAV – YEK (Federasyona Komelên Êzidiyan), Kurdische Zentrum Berlin, CIK ( Civaka Îslami ya Kurdistanê), Enstituta Kurdî – Elmanya, Enstituta Kurdî – Bruksel, MŞD ( Meclîsa Şingal a Derveyî Welat), YMK ( Yekîtiya Mamosteyên Kurdistanê), YES (Yekitiya Êzdiyên Sûri), Kurdisch Gemeinde Brandenburg – Berlîn, Dachverband der Êzidischen Frauenräte, DKF (Deutsch-kurdisches Forum) e.V Dresden, Kongreya Gel a Mezopotamyayê, Partiya Azadiyê ya Mezopotamyayê û Kurdistan human rights Association