NAVENDA NÛÇEYAN - Di çarçoveya hemleya TJK - E'yê ya bi dirûşma "Ji bo azadî û guhertinê tu jî rabe ser piyan" jinên kurd û dostên wan daketin qadan. 

 

Di pêşengiya Tevgera Jinên Kurd ên Ewropayê (TJK -E) de hemleya bi dirûşma "Ji bo azadî û g uhertinê tu jî rabe ser piyan"  hatibû destpêkirin. Di vê çarçoveyê de jinên kurd û dostên wan bi hev re daketin qadan, tundiya li ser jinên, mîlîtarîzm, dagirkerî û qeyûmên ku tayînî Şaredariya Bajarê Mezin a Amed, Wan û Mêrdînê hatin kirin şermezar kirin.

 

Li bajarê Frankfûrt ê Elmanyayê, li paytexta Fransa Parîsê û li bajarê Îtalya Torînoyê bi pêşengiya tevgera jinên Kurd meş hatin kirin û mîlîtarîzm û êrîşên dagirkeriyê yên dewleta Tirk hatin şermezarkirin.

 

Fransa

 

Li paytexta Fransa Parîsê, Bi banga Tevgera Jinên Kurd a Fransayê (TJK-F) û Yekîtiya Jinên Sosyalîst (SKB), pêkhateyên Platforma Demokrasiyê ya Parîsê tevlî meşê bûn. Meşê ji meydana Repûblîqûe dest pê kir û heta meydana Bastîlle dewam kir.

 

Tevî pankart û flamayên Tevgera Jinên Kurd a Ewropayê (TJK-E), flamayên TJK-F, KSB û pêkhateyên Platforma Demokrasiyê ya Parîsê hatin hildan. Di meşê de polîtîkayên dijminatiya li jinê û qeyûm ên rejîma AKP-MHP'ê hatin şermezarkirin. Jinan pankartên li dijî dagirkerî, mîlîtarîzm û şer hildan. Balkêş bû ku gelek jin û zarok tevlî meşê bûn.

 

Li meydana Bastîlleyê piştî deqeyeke rêzgirtinê bi navê SKB'ê Esra Asiye Guden axivî û belavoka Platforma Demokrasiyê ya Parîsê û peyama TJK-E'yê hatin xwendin. Çalakî bi qîrîna dirûşma "Jin, Jiyan, Azadî" bi dawî bû.

 

li bajarê Bordeaûx ê Fransayê jî li qada Grand Theatre bi pêşengtiya Tevgera Jinên Kurd desteserkirina şaredariyan hat şermezarkirin.

 

Elmanya

 

Li bajarê Frankfûrt ê Elmanyayê di çarçoveya kampanya "Ji bo guhertin û azadiyê tu jî rabe ser piyan" meş û mîtîngek pêk hat. Meşê Şemiyê saet 14:30'î bi pêşengiya YJK û Jin ên Nû li ber gara trenê dest pê kir.

 

Di çalakiyê de desteserkirina şaredariyên Wan, Mêrdîn û Amedê yên HDP'î hate şermezarkirin. Meş li meydana Romerê bi mîtîngekê bi dawî bû.

 

 Li bajarê Kolnê yê Elmanyayê di çarçoveya pêngavê de bi tevlîbûna Kurdistanî û dostên wan ên li Koln û derdorî wê dijîn meşek ji saet 13:00’an ji pêşiya Katedrala Dom destpê kir û heta Rûdolfê berdewam kir.

 

Îtalya

 

Li bajarê Torîno yê îtalyayê, dagirkerî, bomberdûman û darbeya qeyûm a dewleta tirk hatin şermezarkirin. 

Çalakiyê li meydana Pîazza Castello dest pê kir û Kurd tevî dostên xwe tevlî bûn.