Roza Metîna 

 

ÊLIH – Şaîre Bîrgul Uşar ke tewrê Fûarê Kitabanê Kurdî yê Êlihî bî, da zanayîş ke bîyayîşê cinîyan ê wareyê edebîyatî de muhîm o û wina vat: “Cinîyê kurdî jîyatî yê û fikrîyenê labelê îmkanê înan çin o. Semedo ke camêrdî azadî nêdanê cinî. Camêrdî vanê, cinî kole yê. La ganî cinî her tim azad bê. Cinî eşkenê edebîyatî ser o zî vinderê, karê xo zî bikerê û keyeyê xo rê zî biewnê.”

 

Şaîre Bîrgul Uşar ke tewrê Fûarê Kitabanê Kurdî yê Êlihî bî, derheqê muhîmîyê edebîyatî, kitaban û bîyayîşê cinîyan ê wareyê edebîyatî de ercnayîş kerd. Bîrgule eynî wextî de bale ant muhîmîyê ziwanê kurdkî ser, perwerdeyê bi ziwanê kurdkî û vat, ganî ziwanê kurdkî azad bo. 

 

‘Edebîyatê cuya komelî de wayîrê cayêk taybet o’

 

Şaîre Bîrgul Uşar destpêk de bale ant muhîmîyê kitabî ser o û vat: ”Ma kitaban nusenê ke semedo ke şarê ma zî her çî bizano. Coka kitabî semedê komelî muhîm ê. Fûaro ke ma beşdar bîyî zî kitabê kurdkî est ê. La ma wazenê her kes biwano, binuso. Sewîyeya wendişê kitaban kêmî yo coka ganî şar kitaban biwano. Kitab edebîyat û kultur merdiman laver beno. Merdimî edebîyatî dir hîna zêde fikrîyeno. Coka edebîyat cuya komelî de wayîrê cayêk taybetî de yo.”

 

‘Ganî mektebê kurdkî bibê’

 

Bîrgule dewam de wina vat: ”Ziwanê kurdkî dinya de ziwanêk dewlemend o. Coka ma bi ziwanê xo binusê no xeylêk muhîm o. Ma her tim wazenê bi ziwanê xo binusê û tutê ma zî bi ziwanê xo perwerde bivînê. Ganî mektebê kurdkî bibê. Çike wexto ke tutê ma şinê mekteb, tirkî qisey kenê. Mi zî bi ziwanê dayîka xo perwerde nêgirewto labelê mi zî waştêne ez bi ziwanê dayîka xo perwerde bivînî.”

 

‘Bîyayîşê cinîyan ê wareyê edebîyatî de muhîm o’

 

Bîrgule dewam de wina qisey kerd: ”Zihniyetê camêrdî vano ke cinî wa keye de rûşo û tena kar bikero. Tena wazenê cinî xizmetê înan û tutan de bê. Coka bîyayîşê cinîyan ê wareyê edebîyatî de muhîm o. Cinîyê kurdî jîyat ê la îmkanê înan çin o. Camêrdî vanê cinî kole yê. La ganî cinî her tim azad bê. Cinî eşkenê her karî bikerê. Cinî semedo ke jîyatî yê coka zî serê edebîyat û kulturê xo de vindenê.”

 

‘Ez hemverê şerî de azadîyêke bi rûmet wazena’

 

Bîrgule tewr peyîn wina vat: ”Ewro şerêk lêşin est o coka ganî aştî û azadî bêro. Ez hemverê şerî de azadîyêke bi rûmet wazena. Wa hêsirê dayîkan nêrê warî û her kes azad bo. Ne kurdî û ne zî tirkî wa zerrîya tu kesî nêveşo. Wa cinî û tutî nêrê qetilkerdiş.”