MERKEZÊ XEBERAN - Rayberê PKKyî Abdullah Ocalan badê 43 aşman reya ewil Îmrali de Omer Ocalanî dir pêvînayîş kerd. 

 

Rayberê PKKyî Abdullah Ocalan ke Zîndanê Tîpê Fyê bi Asayîşê Berzî yê Îmraliyî de yeno tepiştiş, badê 43 aşmî, reya ewilî biraziyê xo Parlamenterê Partiya Têduştî û Demokrasî (DEM Partî) ê Rihayî Omer Ocalanî dir pêvînayîş kerd. 

 

Omer Ocalanî derheqê babete de hesabê xo yê medyaya dîjîtale ser o nê zanayîşî pare kerd: “Birêz Abdullah Ocalanî dir tewr peyîn 3yê adara 2020ine de pêvînayîşê rî bi rî amebî kerdiş. Seke keye ma badê bi serran 23yê teşrîna verêne 2024ine de birêz Ocalanî dir pêvînayîş kerd. Pêvînayîşê keyeyî dir heqêq qanûnî yo û ma wazenê şert û mercî çi benê wa bibê, ganî pêvînayîş bêro kerdiş.”

 

Omerî badê hesabê xo yê medyaya dîjîtale ser o eşkerayîyêke bîne da û vat, “23ê teşrîna verêne de Zîndanê Girawa Îmraliyî de Birêz Ocalanî dir pêvînayîşêk ame kerdiş. No serdayîş çarçewaya pêvînayîşê keyeyî de ame kerdiş. Pêvînayîş de birêz Ocalanî derheqê averşîyayîşê sîyasî yê pêroyî de ercnayîş kerd û waşt no mesaj rayaumûmî rê bêro neqlkerdiş: 'Tecrîd dewam keno. Eke şert û mercî bibê, hêzê min ê teorîk û pratîkî est o ke ez nê prosesî zemînê pêrodayîş û şîdetî vejî wareyê huqûqî û sîyasî.' Weşîya ey baş bî û xeylêk silam her kesî rê kerd.”